Brotist inn heima hjá Snorra Steini

Óvíst er hvort Snorri Steinn Guðjónsson geti spilað með handboltalandsliðinu á móti í Noregi um helgina.

Það var brotist inn á heimili hans í Frakklandi um síðustu helgi og hann þurfti því að fara aftur út til þess að sinna því máli.

„Ég heyrði í honum í gær og það var allt í rústi heima hjá honum. Hann þarf að afgreiða ýmis mál áður en hann getur komið til okkar. Meðal annars að gefa aftur skýrslu á lögreglustöðinni. Ég heyri í honum á morgun og þá vonandi skýrist þetta," segir Aron Kristjánsson landsliðsþjálfari en hann kallaði á Haukamanninn Janus Daða Smárason í stað Snorra.

Strákarnir halda út til Osló á morgun en þeir spila á fjögurra þjóða móti gegn heimamönnum, Dönum og Frökkum. Leikið verður á fimmtudag, laugardag og sunnudag.

„Hann gæti kannski komið í leikina á laugardag og sunnudag. Þetta skýrist allt saman."

Annars er ekkert sérstakt ástand á liðinu því allir aðalvarnarmenn liðsins gátu ekki æft með liðinu í dag vegna meiðsla eða veikinda.

„Bjarki Már er fastur í baki, Vignir er slæmur í rifbeinunum og svo er Tandri með ælupest. Það er smá ástand. Það getur verið að við köllum á mann síðar í dag."