Óku yfir fanga á skriðdreka

Hryðjuverkasamtökin Íslamskt ríki hafa birt enn eitt grimmilegt myndbandið af aftöku fanga samtakanna. ISIS birta reglulega myndbönd af aftökum fanga á samfélagsmiðlum, en aðferðir þeirra virðast verða sífellt grimmilegri. Að þessu sinni var sýrlenskur fangi tekinn af lífi með því að skriðdreka var ekið yfir hann, en vopnaðir menn komu í veg fyrir að hann færði sig.

Sýrlenski herinn hefur sótt gegn uppreisnarmönnum og vígahópum í Sýrlandi undanfarnar vikur, eftir að Rússar hófu loftárásir í landinu. Þar að auki nýtur herinn hjálpar frá vopnuðum sveitum Hezbollah samtakanna frá Líbanon og íranskra hermanna. Hermaðurinn sem lenti í haldi ISIS er sagður hafa verið fangaður í Homs héraði.

Starfsmenn ýmissa samfélagsmiðla eru í stöðugri baráttu við að loka reikningum aðila sem dreifa myndböndum sem þessu, en lítið virðist ganga. Auðvelt er fyrir aðilana að stofna þess í stað nýja reikninga og halda áfram.