Laxveiðisumarið það fjórða besta

Bráðabirgðatölur yfir stangveiði á laxi sumarið 2015 sýna að alls veiddust um 74.000 laxar. Veiði var rúmlega tvöfalt meiri en laxveiðin var 2014. Í heild var fjöldi stangveiddra laxa 2015 sú fjórða mesta frá upphafi og um 55% yfir langtímameðaltali áranna 1974-2014, segir í frétt frá Veiðimálastofnun.

Til að fá samanburð við fyrri ár lagði Veiðimálastofnun mat á hver laxveiðin hefði orðið ef engu hefði verið sleppt aftur og veiði úr sleppingum gönguseiða var einnig frá dregin. Sú niðurstaða leiðir í ljós að stangveiði á laxi 2015 hefði verið um 51.820 laxar, sem er litlu hærra en var árin 2008 og 2009 en lægra en metveiðin frá 1978 þegar afli í stangveiði var alls 52.597 laxar.

Aukning varð í laxveiði í öllum landshlutum en mest þó á Norðurlandi vestra og Vestfjörðum þar sem veiði varð sú mesta frá upphafi skráninga. Má geta þess að Blanda og Miðfjarðará slógu báðar sín met – og met yfir veiði úr sjálfbærum ám – og voru samanlagðar lokatölur þeirra tveggja tæplega 11.000 laxar.