Stjarnan Lengjubikarmeistari í karlaflokki

Stjörnumenn báru sigur úr býtum í úrslitaleik Lengjubikarsins í karlaflokki í dag gegn Þór Þorlákshöfn en Stjarnan vann úrslitaleikinn með fjórtán stigum, 72-58. Góður seinni hálfleikur gerði útslagið í leiknum en staðan var jöfn í hálfleik.

Leikmenn Stjörnunnar byrjuðu töluvert betur í leiknum og leiddu 23-15 eftir fyrsta leikhluta en liðin fóru jöfn inn í hálfleik í stöðunni 35-35.

Stjarnan setti í lás í þriðja leikhluta og leiddi með tíu stigum eftir þrjá leikhluta, 55-45. Leikmönnum Þórs tókst að minnka muninn niður í sex stig um tíma í fjórða leikhluta en lengra komust þeir ekki og tókst leikmönnum Stjörnunnar að bæta við forskotið eftir því sem leið á leikinn.

Fór svo að Stjarnan hafði betur í leiknum og varð Lengjubikarmeistari í karlaflokki í fyrsta sinn en Al'lonzo Coleman var atkvæðamestur í liði Stjörnunnar með 16 stig ásamt því að taka 8 fráköst. Marvin Valdimarsson setti niður fimmtán stig en þá var Justin Shouse öflugur með 13 stig, 10 fráköst og 5 stoðsendingar.

Í liði Þórs var það Vance Michael Hall sem var stigahæstur með 18 stig en Ragnar Ágúst Nathanaelsson bætti við tvöfaldri tvennu með 10 stig og 15 fráköst.