Erlent

Met Elísabetar Bretadrottningar: „Hefur verið klettur stöðugleika í síbreytilegum heimi“

Atli Ísleifsson og Heimir Már Pétursson skrifa
Mikill mannfjöldi var saman kominn á Waverley-lestarstöðinni í Edinborg í morgun þegar drottningin kom til borgarinnar.
Mikill mannfjöldi var saman kominn á Waverley-lestarstöðinni í Edinborg í morgun þegar drottningin kom til borgarinnar. Vísir/AFP
Elísabet II Bretadrottning verður síðar í dag sá þjóðhöfðingi Breta sem lengst hefur setið á valdastóli. Hún slær þá met langalangaömmu sinnar, Viktoríu drottningar.

Þetta gerist klukkan 16:30 að íslensku tíma en þá verður hún búin að sitja á drottningarstóli í 63 ár og sjö mánuði, eða 23,226 daga, sextán klukkustundir og um það bil 30 mínútur.

Sinnir embættisverkum í Skotlandi

Drottningin, sem er 89 ára gömul, mun sinna opinberum embættisstörfum í Skotlandi þegar þessi merki áfangi næst. Mikill mannfjöldi safnaðist saman á Waverley-lestarstöðinni í Edinborg í morgun þar sem lestarinnar með drottningu um borð var beðið. Veður setti þó strik í reikninginn og seinkaði komunni um einhverjar mínútur.

Störfum neðri deildar breska þingsins verður hætt í um hálftíma síðar í dag þegar David Cameron forsætisráðherra hyggst flytja tölu og hylla drottninguna. Cameron tísti fyrr í dag að síðustu 63 árin hafi drottningin verið „klettur stöðugleika í síbreytilegum heimi“.

Tilviljun örlaganna

Núverandi forsætisráðherra Bretlands var ekki fæddur þegar Elísabet varð drottning og má segja að hún hafi gengið með þjóð sinni í gegnum alla nútímasögu Evrópu.

Elísabet tók við krúnunni þann 6. febrúar 1952 þegar faðir hennar, Georg VI, féll frá. Segja má að Elísabet hafi í raun orðið drottning fyrir tilviljun örlaganna vegna þess að faðir hennar átti í fyrstu aldrei að verða konungur.

Þegar föðurbróðir hennar Játvarður áttundi afsalaði sér konungstign vegna sambands hans við Wallis Simpson tók faðir Elísabetar við krúnunni og varð þá Georg sjötti. Hann lést fimmtán árum síðar og Elísabet varð drottning aðeins 25 ára gömul í febrúar 1952 og krýnd í júní ári síðar.

Þá var Winston Churchill forsætisráðherra sem var hlýtt til drottningarinnar. Þar á eftir komu Wilson og Margaret Thacher svo dæmi séu tekin af þeim tólf forsætisráðherrum sem hafa þjónað henni, nú síðast Cameron en fjórtán ár voru í fæðingu hans þegar Elísabet varð drottning.

Móðir Elísabetar varð 102 ára

„Ég lýsi yfir frammi fyrir ykkur öllum að allt mitt líf, hvort sem það verður langt eða stutt, mun ég tileinka þjónustu við ykkur og fjölskyldu þess mikla heimsveldisins sem við tilheyrum,“ sagði Elísabet II í fyrsta sjónvarpsávarpi sínu.

Og það gæti orðið langur tími því móðir hennar og nafna varð 102 ára en drottningin, sem nú er 89 ára,  hefur sagt að starf hennar sé ævistarf. Hún gæti því átt eftir að ríkja í rúman áratug í viðbót.

Tíu menn hafa verið forseti Bandaríkjanna á valdatíma Elísabetar og hún hefur hitt þá alla, eins og vandræðatólið Nixon, Hollywood leikarann Ronald Reagan sem hún fór í útreiðartúr með,  Bush feðgana George eldra og yngri, Bill Clinton og núna síðast Barack Obama. Þá hafa níu menn setið á páfastóli í valdatíð hennar.

Aðlaga sig breyttum tímum

Simon Lewis, fyrrverandi upplýsingafulltrúi drottningarinnar, sagði nýlega að konungsfjölskyldunni hafi tekist að aðlaga sig breyttum tímum og komist í gegnum margar tilvistarkreppur, aðallega vegna hæfileika drottningarinnar. Sú alvarlegasta hafi verið skilnaðir barna hennar og dauði Díönu prinsessu.

Mest lesið


Fleiri fréttir

Sjá meira


×

Mest lesið