Pínleg byrjun Tiger á Opna bandaríska

Chambers Bay völlurinn sýndi allar sínar hættulegustu hliðar á fyrsta hring á US Open sem hófst í dag en margir af bestu kylfingum heims áttu í stökustu vandræðum með hörðu flatirnar, djúpu glompurnar og vindinn sem blés við strendur Seattle á þessum glæsilega strandavelli.

Henrik Stenson og Dustin Johnson deila forystusætinu eftir fyrsta hring sem þeir léku á 65 höggum eða fimm undir pari en sá síðarnefndi lék frábært golf í dag og hefði hæglega getað komið inn á færri höggum ef pútterin hefði verið heitari.

Bandaríska ungstirnið Patrick Reed kemur einn í þriðja sæti á fjórum höggum undir pari en nokkrir kylfingar deila fjórða sætinu á þremur undir.

Meðal þeirra kylfinga sem áttu í vandræðum í dag voru Martin Kaymer og Rory McIlroy en þeir léku á 72 höggum eða tveimur yfir pari. Vandræði McIlroy voru flest öll á flötunum en hann missti hvert púttið á fætur öðru á fyrsta hring.

Þá halda erfileikar Tiger Woods áfram en hann lék sinn versta hring á ferlinum í US Open. Það var oft á tíðum pínlegt að horfa á Woods klúðra hverju högginu á fætur öðru en hann lék á 80 höggum eða tíu yfir pari og situr meðal neðstu manna á skortöflunni.

Annar hringur verður í beinni útsendingu frá klukkan 17:00 á Golfstöðinni.