Markaðs­mis­notkunar­málið: Óvenjulegar en ekki ólöglegar lánveitingar

Bjarki Diego, fyrrverandi framkvæmdastjóri útlána hjá Kaupþingi, situr nú fyrir svörum saksóknara í umfangsmiklu markaðsmisnotkunarmáli bankans. Bjarki er ákærður fyrir umboðssvik vegna lánveitinga til eignarhaldsfélaganna Holt og Desulo sem keyptu hlutabréf í Kaupþingi með fullri fjármögnun bankans á árinu 2008. Bjarki svarar spurningum saksóknara úr vitnastúku en hann er sá fyrsti af ákærðu sem gerir það. Aðrir hafa setið við hlið lögmanns síns.

 

Er Bjarka gefið að sök að hafa farið út fyrir heimildir sínar og stefnt fjármunum bankans í hættu vegna aðkomu sinnar að lánaveitingunum en við upphaf skýrslutökunnar í morgun hafnaði Bjarki þessu alfarið.

 

„Því er ítrekað haldið fram í ákæru að ég hafi komið að því að greiða út lán. Frá því ég kem að þessum lánum þá fara engir peningar út úr bankanum fyrir mína tilstuðlan hvorki með beinum né beinum hætti,” sagði Bjarki.

 

Hann lýsti þessu síðan betur.

Telur engin lög hafa verið brotin

„Hvernig er upphafið að þessu viðskiptum? Æðstu yfirmenn bankans selja hlutabréfin og við söluna færast þau yfir á vörslureikning kaupandans. Við það myndast skuld á þessum sama vörslureikningi og það myndast krafa sem bankinn á á kaupandann.”

 

Krafa hefði síðan verið bókuð í kerfi fjárstýringar sem var svo greidd til eigin viðskipta bankans.

 

„Það eru því ekki einu sinni hreyfingar milli hæða. Það fór enginn peningur út úr bankanum en þetta kemur hvergi fram í ákæru. Þar er látið að því liggja að peningur hafi farið út úr bankanum.”

 

Sagði hann lánveitingarnar til Holt og Desulo hafi vissulega verið óvenjulegar en þær voru löglegar. Það lægi fyrir í gögnum málsins að lánanefndir bankans hafi samþykkt lánveitingarnar og því hafi engin lög eða reglur verið brotin.

Hreiðar, Sigurður og Ingólfur sama sinnis

Þegar Björn Þorvaldsson, saksóknari, hóf að spyrja hann út í lánveitingarnar útskýrði Bjarka betur hvað hefði verið óvenjulegt við þær. Sagði hann að þar sem viðskiptin með hlutabréfin hefðu í raun þegar farið fram þá væri skuldbinding um lán í raun þegar til staðar.

 

Um þetta er ágreiningur þar sem æðstu stjórnendur bankans, þeir Hreiðar Már Sigurðsson, Sigurður Einarsson og Ingólfur Helgason, telja að hægt hefði verið að vinda ofan af skuldbindingu bankans ef lánanefnd hefði ekki samþykkt að lána fyrir hlutabréfakaupunum. Um þetta sagði Bjarki:

 

„Það er ljóst að það hefur augljóslega stofnast skuldbinding áður. [...] Það er því ekki rétt [að það hefði verið hægt að vinda ofan af viðskiptunum] því það hefði myndast yfirdráttur á vörslureikning þess sem var búinn að kaupa bréfin.”

Uppfært klukkan 13: Verjendur Ingólfs Helgasonar gera athugasemdir við það sem Björn Þorvaldsson hélt fram við skýrslutöku í dag, og haft er eftir honum í fréttinni, að Ingólfur hafi sagt að hægt yrði að vinda ofan skuldbindingum bankans vegna fjármögnunar til hlutabréfakaupa. Hið rétta er að Ingólfur hefur aldrei haldið því fram við réttarhöldin og fór saksóknari því með rangt mál í morgun.