Hogdson sakar ljósmyndara um njósnir

Roy Hodgson, þjálfari enska landsliðsins, er allt annað en ánægður með ljósmyndara sem náði mynd af pappírssnifsi með mögulegu byrjunarliði Englands gegn Litháen í undankeppni EM 2016 á föstudag.

Ljósmyndari náði umræddri mynd en þar sást möguleg uppstilling Hodgson á föstudag. Harry Kane, leikmaður Tottenham, var þar stillt upp í fremstu víglínu ásamt fyrirliðanum Wayne Rooney.

Andros Townsend, Ross Barkley, Ryan Mason og Theo Walcott voru á miðjunni í uppstillingu Hodgson og þeir Phil Jones og Chris Smalling miðverðir.

Hodgson leit á þetta sem njósnir jafnvel þótt að ljósmyndarinn hafi ekki verið í leyfisleysi á æfingunni.

„Það er hættulegt að gera ráð fyrir þessu [að Kane byrji],“ sagði Hodgson við enska fjölmiðla. „Það er hættulegt að njósna um þessa hluti á æfingu. Staðreyndin er sú að þetta er pappír sem við tökum með okkur á æfingu til að stilla upp liði.“

Hodgson segir það ekki sanngjarnt að hann þurfi að leggja það á sig að muna svona hluti til að forðast „njósnir“ eins og þessar.

„Ef þetta er það sem fólk vill lesa úr þessum njósnum þá er það undir þeim sjálfum komið.“