Sýndu Bigga löggu brjóstin á B5

#FreetheNipple-átakið í liðinni viku fór vart framhjá mörgum en sitt sýndist hverjum um það og var Biggi lögga einn af þeim sem gagnrýndu það. Í uppfærslu sem hann birti á Facebook sagði hann tilganginn góðan en efaðist um hvort réttu aðferðinni væri beitt.

Áslaug Arna Sigurbjörnsdóttir, laganemi og fyrrverandi formaður Heimdallar, greinir svo frá því á Twitter-síðu sinni að Biggi lögga hafi mætt á skemmtistaðinn B5 í gærkvöldi.

Segir Áslaug að stelpur sem staddar voru á staðnum hafi gert sér lítið fyrir, tekið niður bolina og sýnt Bigga löggu brjóstin á sér.

Engum sögum fer af því hvernig löggan tók í framtakið en #FreetheNipple-átakinu virðist að minnsta kosti langt því frá lokið.

Bigi Lögga mættur á B5 og stelpur taka niður bolina og sýna honum brjóst! Íslenskar konur engum líkar #FreeTheNipple

— Aslaug Sigurbjornsd (@aslaugarna) March 29, 2015