Sá tuttugasti í höfn hjá KR-ingum

Deildarmeistarar KR-inga áttu ekki í miklum vandræðum með því að landa tuttugasta deildarsigri tímabilsins þegar þeir sóttu Fjölnismenn heim í Grafarvoginn. KR vann leikinn með 17 stiga mun, 100-83.

KR-liðið vann því 20 af 22 deildarleikjum sínum á tímabilinu en liðið var búið að tryggja sér deildarmeistaratitilinn fyrir nokkru. KR vann alla leiki sína nema útileiki á móti Tindastól og Haukum.

Fjölnismenn eru fallnir í 1. deild og úrslitin í leiknum skiptu því ekki máli hvað varðar lokastöðuna í deildinni.

Michael Craion var með 24 stig, 8 fráköst og 6 stoðsendingar fyrir KR-liðið í Dalhúsum í kvöld og Darri Hilmarsson skoraði 19 stig.

KR var reyndar bara einu stigi yfir eftir fyrsta leikhlutann, 24-23, en vann annan leikhlutann hinsvegar 27-9 sem skilaði liðinu 19 stiga forystu í hálfleik, 51-32.

KR vann þriðja leikhlutann 24-22 og gat leyft sér að gefa aðeins eftir í lokaleikhlutanum þar sem Fjölnisliðið skoraði 29 stig.