Inter úr leik eftir tap á heimavelli | Sjáðu mörkin

Inter, sem sló Stjörnuna úr leik í forkeppni Evrópudeild UEFA í haust, tapaði í kvöld fyrir þýska liðinu Wolfsburg á heimavelli, 2-1.

Þetta var síðari leikur liðanna í 16-liða úrslitum og unnu Þjóðverjarnir sannfærandi samanlagðan sigur, 5-2.

Daniel Caligiuri kom Wolfsburg yfir í fyrri hálfleik en Rodrigo Palacio jafnaði metin fyrir ítalska liðið á 71. mínútu áður en hinn danski Nicklas Bendtner tryggði Þjóðverjunum sigur á 89. mínútu. Mörkin má sjá hér neðst í fréttinni.

Zenit frá St. Pétursborg er komið áfram eftir 2-1 samanlagðan sigur á Torino þrátt fyrir 1-0 tap á Ítalíu í kvöld.

Þá vann Sevilla 2-1 sigur á Villarreal á heimavelli og 5-2 samanlagt. Club Brugge er einnig komið áfram eftir góðan 3-1 sigur á Besiktas í Tyrklandi og 5-2 samanlagt.

Framlengja þurfti viðureign Ajax og Dnipro og stendur framlengingin nú yfir.