Zinzino Balance shake sagður lækna túrverki, kransæðastíflu, sykursýki, bakflæði; laga Asperger og ADHD, sjón, lesblindu...

Verulegt uppnám ríkir nú í röðum þeirra sem stunda óhefðbundnar lækningar og/eða selja heilsutengdan varning. Vísir greindi frá tilmælum stjórnenda til sölumanna sinna nú í morgun, sem selja Zinzino Balance shake, þess efnis að nú væri kastljós fjölmiðla á þeim og því þyrfti að stíga varlega til jarðar og fylgja fyrirmælum.

En, reynslusögur af undralyfinu Zinzino Balance shake eru með miklum ólíkindum og svo virðist sem þetta sé allra meina bót, en um er að ræða heilsuvörur sem byggja á fitusýrum sem unnar eru sérstaklega úr holdi fisks. Zinzino Balance-vörunar eru sagðar geta breytt fitusýrujafnvægi líkamans með einföldum hætti. Samsetning Zinzino Balance er byggt á fiski- og ólífuolíu sem líkaminn fær omega-3 úr og með því tvenns konar fitusýrur (EPA og DHA) sem mannslíkaminn getur ekki framleitt sjálfur heldur verður að fá með mat.

Hjónin Ásgeir Halldórsson og Guðrún Brynjólfsdóttir eru stjórnendur hópsins og ef orð Ásgeirs á Facebooksíðu hans eru tekin bókstaflega er hann ánægður með þá umfjöllun:  „Ég er þakklátur Vísi fyrir að dreifa tilkynningum fyrir mig. Ég næ nú til miklu stærri hóps en mig óraði fyrir þegar ég árétta góð vinnubrögð fyrir mínu fólki. Takk fyrir mig,“ skrifar Ásgeir og með fylgir broskall.

Bannað að dreifa reynslusögum

En, hópurinn sem Ásgeir talar til er leynilegur og læstur. Hvert er fólk Ásgeirs og hvað hefur það til málanna að leggja? Vísir skyggndist bak við tjöldin, í þann lokaðan hóp sem kenndur er við Zinzino. Þar er að finna reynslusögur og í ljós kemur að  Zinzino Balance shake er að sögn þeirra sem þar tjá sig algjört undraefni og fáir kvillar og sjúkdómar óhultir þegar það er annars vegar.

Fólki er hins vegar meinað að dreifa fagnaðarerindinu. Þannig er kona nokkur sem spyr hvort ekki sé sniðugt að nota reynslusögurnar? En, Guðrún segir það ekki óhætt: „Samkvæmt nýjum reglum sem tóku gildi 14 des, er bannað með lögum að nota svona sögur opinberlega þar sem þetta kallast nú Medical clame. En við erum að safna þessu hér inn fyrir söluaðila að sjá.“ Og Ásgeir áréttar þetta: „Það er í lagi að segja nafnlaust frá, en það má ekki afrita og birta reynslusögurnar annarstaðar.“

Vísir er sem betur fer ekki bundinn af því að mega ekki segja af undrum Zinzino Balance shake og hefur fyrir því fólk sem tjáir sig innan hópsins. Það virðist trúa á efnið en nöfn sögumanna eru ekki látin fylgja.

Ballance best í heimi

„Ég er búin að taka ballans sjeikin í 3 mánuði núna. Hjá mér virkar hann vel á taugakerfið sef rólegar og hárið á mér þéttist og braggast mæli með þessu,“ skrifar einn. Og annar segir: Ég finn hvað ég sef mikið betur og vöðvabólgan í skrokknum er minni.“ En, þetta er ekkert á við reynslu konu nokkurrar: „Fyrir ca. ári síðan var ég að taka 6 teg. af hjartalyfjum og var með kransæðastíflu. Í dag er ég aðeins á 3 teg. af lyfjum og þurfti ekki að fara í þræðingu og fyrir ári síðan lenti ég í bílslysi og ef ég væri ekki að taka Balance vörunar þá væri ég öruglega ekki vinnufær í dag. Balance er best í heimi.“

Og rétt rúmlega fertug kona hefur sögu að segja:

„Árið 2007 greindist ég með Cushing sem er hormónasjúkdómur. Ég var með æxli sem framleiddi 30x of mikið af cortisoni. Ég var búin að vera mjög veik í næstum 2 ár áður en ég greindist og sökum þessa þá var þessi sjúkdómur farin að herja á alla liði, vöðva, og önnur líffæri með óafturkræfum afleiðingum. Mér var sagt að eftir aðgerð þar sem æxlið var tekið og lyfjameðferð þá yrði það samt svo að þetta myndi há mér það sem eftir væri ævinnar og þá sérstaklega vöðvaþreytan. Ég var líka með samskonar æxli í heila sem var látið vera þar sem það var í dvala og afleiðingarnar við að taka það yrðu verri en ef það væri látið vera. [...]

Einnig er ég með genetískan nýrnasjúkdóm, svokölluð blöðrunýru (Polycystic nýru). Vegna hans var ég að fá nýrnaköst með nokkura daga millibili. Við þeim var ekkert hægt að gera nema leggjast niður og bíta á jaxlinn.“

Til að gera langa sögu stutta þá byrjaði konan að taka „Balance“, er farin að labba rösklega, hefur ekki fengið nýrnakast í 2 mánuði, útlitsbreytingar eru þannig að fólk furðar sig á viðbrigðunum og hvað æxlið varðar: „Ég fór svo í mitt árlega tékk í byrjun mánaðarins og voru allar niðurstöður það góðar að sérfræðingurinn sagðist varla trúa þessu. Hún sagði meira að segja að ef ég yrði enn svona góð eftir eitt ár, þá myndi hún sleppa mér!!!“

Gott við flogaveiki

Sögurnar eru margar. Kona nokkur segir svo frá: „Slitgigtar verkir í baki, höfuðverkir, exemblettir, svefnleysi og betri orka, fólk að ná árangri á rúmri viku, farið að finna mun, það er alveg meiriháttar.“ Og karlmaður segist sig hafa snarlagast af sykursýki II. Enn ein kona segir að kólestrólmagn hafi lagast til mikilla muna. Og Ásgeir sjálfur skýtur inní upplýsingum utan úr hinum stóra heimi: „Tekið af Zinzino All Countries um flogaveiki: Annemari Laiho: I have epilepsy... Because of our balance oil and a few changes to my eating habits, I don't need to use any medicine anymore.. I don't say that I have experienced miracle healing but I don't have seizures so often anymore.. Maybe twice in two months... Before I had at least one seizure a week.“

 

Asperger og ADHD lagast

Fótapirringur og verkir í hnjám hverfa og kona nokkur segist hafa átt við margvísleg vandamál að stríða: „Ég hef sjálf verið að glíma við bakflæðisvandamal, magabolgur etc og þurft á lyfjum að halda og alls kyns mixturum í ein 20 ár. Get varla líst þeim miklu breytingum sem hafa orðið siðan ég byrjaði á balance fyrir rúmum 2 manuðum. Laus við oll lyf eins og staðan er núna og finn afar sjaldan fyrir óþægindum.“

Og áfram steyma sögurnar. Vísir tæpir aðeins á broti af þeim. Áhrifarík er til að mynda saga konu sem greinir frá reynslu sonar síns. „Ég setti 7 ára son minn á balance,hann er með Asperger og ADHD hingað til hefur hann ekki verið að leika við neina krakka og hefur verið 80% af tíma sínum í skólanum í námsveri þar sem hann fær að læra einn með kennara, einn daginn kom hann heim og sagði "mamma ég þarf ekki lengur að vera í verinu því ég get lært í stofunni og ég fékk svo minn gleði trylling að ég hrigdi í kennarann og spurði og fékk þau svör að þetta væri hárrétt og það væri búið að minnka námsverið hjá honum niður í 20%.“

Lesblinda lagast

Önnur kona segir frá því að hún hafi átt við mígreni að stríða og ljósfælni. „Svo þó ég sé ennþá með mígreni og fái höfuðverk af og til þá er þetta svo mikill munur fyrir mig. Lífsgæðin mín hafa aukist umtalsvert.“

En, mýgrenið bliknar í samanburði við eftirfarandi sögu, sem kona í hópnum færir til bókar:

„Ég er lesblind en það eru kannski 2 ár síðan að ég komst að því að ég væri lesblind, hélt bara alltaf að ég væri svona svakalega léleg í íslensku.(enda lent mikið í einelti út af því) Ég er mjög lengi að lesa og það er líka þannig að þegar ég fer á 3D myndir í bíó þá er ég mjög fljot að þreytast i augunum. Ég fór svo í bíó um daginn á Hobbitan og vissi ekki að það væri verið að sýna hana í 3D, ég man að þegar ég var á leiðinni inn í salinn, shit þetta er 3 tíma mynd, hvernig verð ég eiginlega þegar myndin er búin. Ég tók strax eftir því að það var öðruvísi að setja a sig gleraugun, því vanalega þá tekur það mig smá tíma að venjast. Þegar myndin var búin að vera í einhverjar mínútur fattaði ég að ég var ekkert þreytt í augunum og ég brosti mínu breiðasta, rétt fyrir hlé fann ég aðeins fyrir þreytu en eftir hlé var allt orðið gott aftur og ég horfði á restina á myndinni án vandræða. Þegar ég var svo komin heim og fór að hugsa um þegar ég er að lesa og gengur það betur fyrir sig, ég les en hægt en samt ekki alveg eins hægt og áður og ég er ekki að lesa sömu setninguna aftur og aftur, þannig að Balance Shakinn hefur hjálpað með lesblinduna mína sem var líklegast eina á listanum sem ég trúði ekki á að það gæti orðið eitthvað betra svo að ég elska Balance Shakinn.“

 

Athyglistbrestur og vefjagigt mega undan láta

Konur eru einhverra hluta vegna miklum mun duglegri við að dreifa reynslusögum en karlar: „Sonur minn mældi sjónina eftir 9 mánuði á balance og hafði hún breyst úr -1,25 í - 0,75 og hann var farinn að finna mun á sjóninni áður en hann lét mæla sig  Balance er málið.“

 

Enn ein kona víkur sögu af athyglisbresti sínum á háu stigi, það þýði ekki fyrir sig að reyna að lesa eða gera eitthvað sem krefst einbeitingar í fjölmenni. En allt þetta lagaðist við „Balance“ og þá lætur enn ein kona ekki sitt eftir liggja og leggur þetta til í reynslusögusafnið: „Sæl ég er búin að vera mjög slæm af vefjagigt í mörg ár og hef sofið mjög illa vöknuð um kl 4 fer þá að snúa mér á alla kanta og finn enga stellingu til að sofa þá er bara ráð að fara á fætur en núna eftir að ég fór að taka Balance þá er ég farin að sofa mun betur sef alla nóttina sem er mikil breyting geggjað,hefði ekki trúað að þetta myndi gerast svona fljótt húrra frábært að fá betri líðan.“

 

Og rúmlega fertug kona segir af miklum túrverkjum fyrir blæðingar og í byrjun blæðinga. „Sem unglingur oft nærri meðvitundalaus af verkjum. Búin að taka balans frá því í lok nóvember í byrjun janúar byrjar á blæðingum fyrirvaralaust án nokkurra fyrirvaraverkja  víjjjjj love it.“

Kraftaverkadjúsinn

Ein kona segir sögu af litla bróður mannsins síns sem er með tourett. „Hann hefur breytt mataræðinu töluvert síðastliðið eitt og hálf/tvö ár, tekið mikið út sykur og hveiti og tourette einkennin hafa minnkað mikið við það. Alltaf þegar hann hefur stolist í óhollustu (kökur eða nammi) þá hafa einkennin aukist um leið. Nú er hann búinn að vera á balance í rúmar tvær vikur og hann finnur gríðarlega mikinn mun. Síðustu helgi fór hann t.d. í afmæli og fékk sér kökur og nammi á laugardaginn og tourette einkennin jukust ekki við það og það er eitthvað sem hefur ALDREI gerst áður! Þannig að balance hefur, í okkar tilfelli, mjög góð áhrif á tourette.“

 

Sögurnar eru margvíslegar og ein kona greindist með krabbamein fyrir ári síðan og var að ljúka meðferð í janúar. „Eftir lyfjameðferðina þjáðist ég mjög af miklum bólgum, átti erfitt með að hreyfa mig og gat til að mynda ekki beygt fingurna fyrst á morgnana. Eins hef ég ekki getað sofið án lyfja, átt erfitt með að vakna og verið orkulaus. Ég byrjaði að taka Balanceshake fyrir rúmum tveimur vikum síðan. Ég er öll önnur í líkamanum, finn ekki fyrir neinum bólgum lengur í höndunum (gæti spilað píanókonsert í morgunsárið, ef ég kynni að spila á píanó) sofnaði í gærkvöldi svo til um leið og ég lagðist á koddan - LYFJALAUST - svaf ótruflað í alla nótt og vaknaði hress og endurnærð kl. 6:30 í morgun. Ég kalla þetta kraftaverkadjúsinn minn!“

 

Afinn mun aldrei hætta á Balance

Sögurnar um þetta undralyf eru miklu fleiri. Í raun virðist enginn sjúkdómur til sem Zinzino Balance shake virkar ekki á, en verst er að þeir sem selja drykkinn verða að pukrast með þessar sögur. Kannski er ágætt að ljúka þessari yfirferð á sögu sem maður nokkur má til með að deila, sem snýr að reynslu afa hans af „balance“:

„Þessi saga er lýgilega ótrúleg! Afi minn er 75 ára og hefur verið að þjást af rosalegri vöðvabólgu á til margra ára. Þessi vöðvabólga er svo skæð að hún leiðir upp í höfuð, svo illilega að hann er rúmliggjandi og hann er af gamla skólanum þ.e. að hann er ekki rúmliggjandi nema dauðinn sé á næsta leyti. Í eitt og hálft ár hef ég verið að predika yfir honum með balance-inn en hann er skeptískari en allt og hefur alltaf þverneitað að innbyrða eitthvað duft drasl eins og hann orðaði það. Einn dag fyrir um fjórum mánuðum var ég staddur hjá honum og einmitt var það eitt tilfellið þar sem hann var í rúminu af sársauka. Mér stóð ekki á sama og tók málið í mínar hendur, ég sagði einfaldlega "hvar er visa kortið þitt, þú ert að fara taka inn shake-inn". Og viti menn það liður nokkrir dagar frá fyrsta skammti og hann fann ekki fyrir vöðvabólgu og hefur ekki fundið fyrir henni síðan. Það sem meira er að hann fór á knattspyrnuleik til Englands yfir eina helgi og gleymdi mixinu sínu, hann kom heim sárþjáður af vöðvabólgu. Það fyrsta sem hann gerði var að fá sér mixið sitt. Þessi ferð sannaði algjörlega fyrir honum að þessi vara virkar! Og hann mun ALDREI hætta á balance!“

Innlegg frá Ásgeir Halldórsson.