Bronsliði HM pakkað saman í kuldanum

Það var kalt á Laugardalsvellinum í gærkvöldi en hverjum einasta stuðningsmanni íslenska landsliðsins hlýnaði um hjartarætur við að sjá íslenska landsliðið spila og vinna einn fræknasta sigur sinn frá upphafi.

Eitt og sér er það stórkostlegt afrek að vinna 2-0 sigur á stórliði Hollands, bronsliði HM í Brasilíu. En sigurinn sýndi að árangur Íslands í undankeppni EM 2016 er engin tilviljun.

Liðið er með fullt hús stiga eftir fyrstu þrjá leikina og markatöluna 8-0. Það er nokkuð sem Íslendingar hafa aldrei fengið að kynnast áður og vitanlega besta byrjun okkar í undankeppni.

Ísland á frábæran hóp leikmanna sem áttu allir stórleik gegn Hollandi í gær. Þeir fögnuðu sigrinum vel og innilega í búningsklefanum eftir leik, sem eðlilegt er, en þjálfararnir Lars Lagerbäck og Heimir Hallgrímsson héldu sig til hlés á meðan.

„Við erum ekki komnir til Frakklands enn,“ sagði Lagerbäck, yfirvegaður og afar rólegur, á blaðamannafundinum eftir leikinn í gær. Þegar hann var ráðinn landsliðsþjálfari þann 14. október árið 2011, fyrir þremur árum upp á dag, fögnuðu margir. En enginn sá fyrir að hann gæti náð viðlíka árangri og komið hefur á daginn.

Lagerbäck hrósaði liðinu öllu fyrir frammistöðuna og þá sérstaklega varnarleiknum.

„Hann var nánast fullkominn. Auðvitað hefði ég viljað halda boltanum meira og betur en þegar maður spilar gegn liði eins og Hollandi er það skiljanlegt að varnarleikurinn verði í aðalhlutverki,“ sagði Lagerbäck.

Gylfi Þór Sigurðsson skoraði bæði mörk Íslands í gær og sýndi enn og aftur hvers hann er megnugur. Lagerbäck hrósaði honum mjög, ekki síst fyrir varnarhæfileika hans.

„Hann býr yfir einstökum hæfileikum sem sóknarmaður. En það sem er sérstakt við hann er að Gylfi er líka varnarmaður í heimsklassa. Hann er einn allra besti alhliða leikmaður sem ég hef séð og er jafnvígur í sókn og vörn,“ sagði þjálfarinn sem hrósaði einnig Jóni Daða Böðvarssyni og Emil Hallfreðssyni fyrir þeirra frammistöðu í gær.

„En það má segja þetta um alla leikmenn okkar í dag. Þetta var fyrst og fremst frábær liðsframmistaða,“ sagði hann.

Ísland og Tékkland eru bæði með fullt hús stiga í A-riðli og mætast ytra þann 16. nóvember. Það verkefni verður vissulega erfitt en miðað við frammistöðuna í gær og leikjunum öllum eru þeir til alls líklegir. Ekkert kemur manni lengur á óvart.