Mikil tímamót í sögu Gauksins

Gaukurinn á langa og merkilega tónlistarsögu, og er einn af þeim fáu tónleikastöðum sem eftir eru í bænum, eftir að Nasa og Faktorý lokuðu,“ segir Starri Hauksson, einn eigenda Gauksins, en staðurinn mun taka miklum breytingum á næstu vikum.

Til að fjármagna breytingarnar fer fram mikil tónlistarhátíð á Gauknum en hún hófst í gærkvöldi og lýkur á laugardagskvöldið. Fjöldi þekktra sveita kemur fram til að leggja Gauknum lið. „Það gefa yfir tuttugu hljómsveitir vinnu sína til þess að breyta staðnum til hins betra. Þetta væri ekki hægt ef ekki væri fyrir óeigingirni starfsmanna Gauksins og fleiri aðila sem leggja sitt af mörkum til að gera allt sem þarf að gera til að breyta staðnum,“ bætir Starri við. Kaleo, Brain Police, Reykjavíkurdætur og Kimono eru á meðal þeirra sveita sem koma fram á hátíðinni.

Allur ágóðinn af tónleikahátíðinni rennur í breytingar á staðnum sem snúa að bættri þjónustu við listamenn sem koma fram; stærra sviði, ljósabúnaði, hljóðkerfi og splunkunýjum sal. „Við ætlum að færa sviðið til þannig að þegar gestir ganga inn sjá þeir sviðið strax og skapast þá rými fyrir fleiri sem vilja njóta tónleikanna,“ segir Starri.

Ætlunin er að færa staðinn nær alþjóðastaðli með veitingaþjónustu fyrir listamenn sem koma fram, bættri kynningarþjónustu og litríkari tónleikaaðstöðu. Hver dagur tónleikahátíðarinnar verður helgaður ákveðinni gerð tónlistar. Gærkvöldið var helgað low-fi-trúbadoraívafi, í kvöld verður hiphop og rapp í eldlínunni, annað kvöld er áætlað þungarokkskvöld en laugardagurinn er fyrir lokapartí Gauksins þar sem boðið verður upp á blandaða tónlist.

„Við stefnum á að fara í breytingar sem allra fyrst og vonumst til þess að ljúka þeim í maí,“ segir Starri um breytingarnar.

Aðgangseyrir á alla hátíðina er aðeins 5.000 krónur en stakir miðar á hvert kvöld kosta 1.500 krónur. Thule er opinber styrktaraðili hátíðarinnar.

Hér má nálgast frekari upplýsingar um tónlistarhátíðina á Gauknum.