Næ vonandi að setja niður tvo þrista á næstu fimm árum

Páll Axel Vilbergsson getur í kvöld orðið sá leikmaður sem hefur skorað flestar þriggja stiga körfur í sögu úrvalsdeildar karla. Hann vantar einn þrist til að jafna met Guðjóns Skúlasonar sem er búinn að vera í efsta sæti listans í marga áratugi. Guðjón skoraði 965 þrista í 409 leikjum en Páll Axel er kominn með 964 þrista í 378 leikjum.

„Ég er kominn í aðeins nýtt hlutverk þarna í Borgarnesi og fyrir okkur snýst þetta bara um að bæta leik liðsins og safna stigum. Ég má ekkert vera að því að velta þessu eitthvað fyrir mér,“ segir Páll Axel um metið en hann er nú orðinn spilandi aðstoðarþjálfari liðsins.

Páll Axel er samt líklegur til að bæta metið strax í kvöld, því hann skoraði sjö þrista í síðasta leik, er með 3,2 þrista að meðaltali í leik á tímabilinu og hefur skorað tvær eða fleiri þriggja stiga körfur í níu af tíu deildarleikjum sínum í vetur.

„Ég er búinn að segja það við einhverja að ef heilsan leyfir þá ætla ég mér spila í fimm ár í viðbót. Ef ég næ ekki að skora tvær þriggja stiga körfur á næstu fimm árum þá er ég bara lélegur og ætti bara að hætta þessu,“ segir Páll Axel í léttum tón. Hann er nýorðinn 36 ára.

„Ef þetta kemur ekki á morgun (í kvöld) þá kemur þetta bara seinna. Ég get ekki látið eltingaleik við eitthvert met þvælast fyrir því að Skallagrímur nái góðum úrslitum,“ segir Páll Axel.

Skallagrímur vann góðan sigur í Stykkishólmi í síðustu umferð en liðið tekur á móti Stjörnunni í Fjósinu í Borgarnesi í kvöld.

„Það var góður liðsbragur á þessu hjá okkur í Hólminum og við erum loksins komnir með amerískan leikmann sem er mjög góður,“ segir Páll Axel en hann og Benjamin Smith skoruðu saman 79 stig og 14 þrista í leiknum. „Við byrjuðum tímabilið illa og það er búið að ganga illa. Núna þurfum við bara að safna stigum,“ sagði Páll Axel um framhaldið.