Heimir: Frekar þægilegt, þó það sé fáránlegt að segja það

"Spilamennska Tyrkja kom okkur ekki á óvart því þeir spiluðu svona á móti Dönum. Þetta er í fyrsta skipti undanfairn tvö ár sem þeir spila 3-4-3. Við vissum alveg við hverju við áttum að búast þannig þetta kom okkur ekkert á óvart," sagði Heimir Hallgrímsson, annar landsliðsþjálfara Íslands, á fréttamannafundi eftir sigurinn gegn Tyrkjum í kvöld.

"Spilamennska okkar kom frekar á óvart; hversu ótrúlega vel okkar strákar spiluðu. Það var frammistaða okkar sem skapaði þennan sigur," sagði Heimir.

Heimir var vægast sagt ánægður með leik íslenska liðsins sem hann sagði fullkominn fyrir þjálfarana.

"Fyrir okkur sem fylgjumst með hreyfingu leikmanna og hvernig liðið færi sig var þetta nánast fullkominn leikur," sagði Heimir.

"Tyrkir voru með fimm menn nánast frammi, en við náðum að færa okkar varnarmenn þannig að þeir sköpuðu sér engin færi. Þeir voru að sama skapi galopnir til baka. Það er sjaldgæft að íslenskt landslið skapi sér jafnmörg færi."

Tyrkirnir voru nokkuð fljótir að brotna og höfðu engin svör við leik íslenska liðsins í Laugardalnum í kvöld.

"Við vorum búnir að kynna okkur það vel hvernig þeir spila. Við náðum oft að komast inn í sendinguna sem þeir byggðu sitt spil á. Svo virtust þeir ekki vera með neit plan b og breyttu ekkert leikskipulaginu sínu, þó það sé kjánalegt að segja það. Þetta var frekar þægilegur leikur fyrir okkur, þó það sé fáránlegt að segja þetta. Við þurftum ekkert að breyta okkar skipulagi," sagði Heimir.

Heimir vildi helst ekki hrósa neinum einstaklingi því allir spiluðu svo vel, en hann gat ekki annað en hrósað Jóni Daða Böðvarssyni fyrir frammistöðuna í fyrsta mótsleiknum.

"Það er ósanngjarnt að taka einhvern einn út, en maður verður að tala um Jón Daða sem var að koma inn í sinn fyrsta mótsleik. Hann spilaði frábærlega líkt og Theodór Elmar. Það er gaman þegar svona ákvarðanir þjálfara ganga upp," sagði Heimir, en hvað átti Jón Daði að gera í leiknum?

"Við vissum að þeir myndu reyna að teygja okkur. Hann er duglegur leikmaður með ofboðslega mikla hlaupagetu sem hjálpaði okkur varnarlega. Það er gott að hafa hann og Kolbein svona duglega þarna frammi."

Eyjamaðurinn var vitaskuld ánægður með sigurinn og sagðist vera alveg sama þó Tékkland hafi unnið Holland. Stefnan er eitt af tveimur efstu sætunum og þá má ekki misstíga stig í Lettlandi í næsta leik.

"Mér er alveg sama hvernig fór í hinum leikjunum á meðan við vinnum. Auðvitað ætlum við að berjast fyrir efstu tveimur sætunum. En við erum alveg meðvitaðir um að síðast unnum við Noreg heima og töpuðum svo fyrir Kýpur úti sem átti að vera slakara lið en við. Við ætlum ekki að brenna okkur tvisvar sinnum á sama hlutnum," sagði Heimir Hallgrímsson.