Ron Paul tekur upp hanskann fyrir Rússa

Þingmaðurinn fyrrverandi kom rússneskum yfirvöldum til varnar og bar leiðtoga vesturheims þungum sökum fyrir að dreifa „áróðri“ í kjölfar hraps flugvélar Malaysia Airlines í leiðara sínum í gær.

„Vestrænir stjórnmála- og fjölmiðlamenn gengu í eina sæng til að hámarka útbreiðslu áróðursins eftir hörmungarnar. „Það hlaut að hafa verið Rússland, það hlaut að hafa verið Pútín, sögðu þeir,“ skrifaði Paul. „Meðan vestrænir fjölmiðar voru fljótir að éta upp áróðurinn frá stjórnvöldum þá voru nokkrir þættir sem þeir létu þó algjörlega ósnerta,“ bætti hann við.

Samkvæmt Ron Paul var einn þessara þátta liður Bandaríkjanna í ófriðnum sem ríkt hefur í Úkraínu undanfarna mánuði en stjórnarliðar og andspyrnuhreyfingar hafa barist hatrammlega í austurhluta landsins frá því að Viktori Janúkovitsj var steypt af stóli í febrúar.

„Fjölmiðlar vilja ekki greina frá því að ástandið í Úkraínu á rætur að rekja til loka síðasta árs þegar stjórnarandstæðingar lögðu á ráðin með Evrópusambandinu og Bandaríkjunum um að koma Janúkovitsj frá völdum. Án stuðnings Bandaríkjanna við valdaránið veðrur að teljast ólíklegt að hundruðir hefðu fallið í átökunum sem fylgdu í kjölfarið. Né hefði flugvél Malaysia Airlines verið grandað,“ skrifaði Ron í leiðara sínum.

Bandarísk stjórnvöld hafa leitt líkur að því að undanförnu að uppreisnarsinnar í austurhluta landsins hafi skotið niður flugvélina með vopnum sem rússnesk yfirvöld létu þeim í té. Ron Paul er á öðru máli – Hann segir úkraínsk stjórnvöld bera mestu ábyrgðina.

„Fjölmiðlar vilja heldur ekki greina frá því að hvorki Rússar né aðskilnaðarsinnar í Austur-Úkraínu hafa nokkuð upp úr krafsinu með því að skjóta niður farþegaþotu. Þeir munu ekki greina frá því að úkraínsk stjórnvöld græða mikið á því að koma sökinni á Rússa og að forsætisráðherra landsins hafi lýst yfir ánægju sinni með að þau skuli hafa tekist,“ bætti hann við.

Ron Paul benti á aðra þætti máli sínu til stuðnings, til að mynda hæfni Úkraínu til að skjóta niður flugvélina, að Rússar „hefðu ekki drepið neinn í landinu“ og að uppreisnarmenn hefðu ekki ráðist á óbreytta borgara – bara hermenn.

Undir lok skrifanna útilokaði hann þó ekki að hann gæti haft rangt fyrir sér:

„Auðvitað er fullkomlega líklegt að ríkisstjórn Obama hafi haft rétt fyrir sér allan tímann og að Rússar og aðskilnaðarsinnar í Austur-Úkraínu hafi skotið niður flugvélina,“ skrifaði hann. „Það sem skiptir þó mestu máli er að það er erfitt að nálgast ómengaðar upplýsingar þegar allir taka þátt í áróðrinum.“  

Ron Paul hefur lengi notið mikillar hylli meðal frjálshyggjumanna og hefur hann sóst eftir því að vera forsetaefni Repúblikanaflokksins, nú síðast í kosningum árið 2012.