Tilboð Arsenal í Khedira samþykkt

Samkvæmt spænskum fjölmiðlum mun Real Madrid hafa samþykkt tilboð Arsenal í þýska miðjumanninn Sami Khedira.

Þjóðverjinn hefur verið sterklega orðaður við Lundúnarfélagið síðustu daga en fullyrt er að Arsenal hafi komist að samkomulagi við Madrídinga sem vildu fá 20 milljónir punda eða tæpa fjóra milljarða króna fyrir kappann.

Arsenal samdi nýverið við Alexis Sanchez sem kom frá Barcelona en líklegt er að Real vilji selja Khedira nú þar sem annar Þjóðverji, Toni Kroos, er sagður á leið til spænsku höfuðborgarinnar.

Khedira kom til Real Madrid frá Stuttgart árið 2010 eftir góða frammistöðu með þýska landsliðinu á HM í Suður-Afríku. Hann lék alls 144 leiki með Madrídingum og skoraði í þeim níu mörk en varð fyrir því óláni að slíta krossband í hné síðastliðið haust og missti hann af þeim sökum af stórum hluta tímabilsins.

Fyrir eru þrír leikmenn þýska landsliðsins hjá Arsenal - Mesut Özil, Per Mertersacker og Lukas Podolski.