Sigfús Páll á leið til Japans

Sigfús Páll Sigfússon, leikstjórnandi hjá Fram, er á leið í japanska boltann en hann hefur átt í viðræðum við Wakunaga.

Þetta kemur fram í Morgunblaðinu í dag en Sigfús Páll myndi feta í fótspor Dags Sigurðssonar sem lék með félaginu á sínum tíma.

„Ég er búinn að leigja út íbúðina mína svo ég verð í slæmum málum ef ekki tekst að hnýta þá fáu lausu enda sem eftir eru,“ sagði Sigfús Páll og vonaðist til að dvelja ytra lengur en í eitt ár.

Móðir hans er japönsk og segir hann að það hafi lengi blundað í sér að flytja út og læra málið. „Mig langar að læra japönskuna í eitt skipti fyrir öll,“ sagði Sigfús Páll.