Real Madrid þarf ekki fleiri stjörnuleikmenn

Florentino Perez, forseti Real Madrid, telur að klúbburinn þurfi ekki að fá Galactico til liðs við sig í sumar.

Hugmyndin um Galactico kom í kringum aldarmótin með kaupum Madrídarmanna á Luis Figo frá Barcelona. Hugmynd Real Madrid var að kaupa eina af skærustu stjörnum fótboltaheimsins á hverju ári og kölluðust þeir Galacticos.

Luis Suarez, framherji Liverpool, hefur verið nefndur í umræðunni sem næsti Galactico þrátt fyrir háan verðmiða en ekki verður kvartað undan fjárskorti í höfuðborginni.

„Það eru ekki margir stjörnuleikmenn sem við gætum fengið, þeir eru flestir í liðinu okkar í dag. En það eru margir sem gætu gert gagn í liðinu, ég veit hinsvegar ekki hvort við bjóðum í Suarez.“

Gareth Bale er nýjasti Galactico-inn og hann sýndi fína takta á tímabilinu.

„Hann hefur sannað hversu góður leikmaður hann er á mikilvægum tímapunktum á tímabilinu. Hann hefur legið undir gagnrýni en hann hefur staðið sig vel. Fólk virðist gleyma að hann var besti leikmaður ensku úrvalsdeildarinnar áður en hann kom hingað,“ sagði Perez.