Framboðslisti Pírata tilbúinn í Kópavogi

Ingólfur Árni Gunnarsson, stjórnarmaður í félagi Pírata í Kópavogi, sagði í samtali við Vísi nú rétt í þessu að framboðslisti Pírata væri tilbúinn í Kópavogi.

„Við erum búin að safna undirskriftum og búin að gera allt klárt og erum bara í þessum töluðu orðum að ganga inn til yfirkjörstjórnar í Kópavogi og skila af okkur öllum gögnum sem þarf til að bjóða fram. Það hefur allt gengið afar vel hjá okkur og við erum tilbúin í kosningabaráttu,“ segir Ingólfur.

Stjórn Pírata í Kópavogi sagði af sér í gærkvöld eftir langan hitafund. Að því er fram kom í tilkynningu frá nýjum stjórnarformanni, Einari Páli Gunnarssyni, sagði stjórn af sér eftir að fundur hafði samþykkt að taka á dagskrá vantrauststillögu.

Hér að neðan má sjá þá sem skipa fjögur efstu sætin:

1. Ingólfur Árni Gunnarsson

2. Einar Páll Gunnarsson

3. Gunnar Þór Snorrason

4. Bjartur Thorlacius

Allar fréttir af sveitarstjórnarkosningunum 2014 má nálgast á Kosningavef Vísis, visir.is/kosningar