ÍR-ingar nálgast úrslitakeppnissæti | Myndir

Stórleikur Terrence Watson dugði ekki til þegar ÍR-ingar unnu góðan þriggja stiga sigur á Haukum í Hafnarfirði í Domino's-deild karla í körfubolta í gærkvöldi.

Matthías Orri Sigurðarson, Hjalti Friðriksson og Nigel Moore voru allir með 22 í framlagi hjá ÍR-ingum sem lögðu grunninn að sigrinum með frábærum þriðja leikhluta sem þeir unnu 32-17.

Kári Jónsson náði að minnka muninn í eitt stig 86-85 með þriggja stiga skoti þegar tvær sekúndur lifðu leiks. Matthías Orri kláraði hins vegar leikinn af vítalínunni fyrir gestina úr Breiðholtinu.

ÍR-ingar eru nú með 8 stig í 9. sæti ásamt Skallagrími og farnir að anda ofan í hálsmálið á Snæfellingum sem hafa 10 stig í 8. sæti. Það er síðasta sætið sem gefur þátttökurétt í úrslitakeppninni.

Vilhelm Gunnarsson, ljósmyndari Fréttablaðsins og Vísis, var mættur í Schenker-Höllina í gærkvöldi og tók myndirnar hér að ofan.