Kolbeinn og Mario Balotelli mætast í Amsterdam í kvöld

Kolbeinn Sigþórsson og félagar leika fyrsta heimaleik sinni í riðlakeppni Meistaradeildarinnar í kvöld þegar þeir fá AC Milan í heimsókn.

Kolbeinn átti flottan leik í Barcelona í síðasta leik en lét verja frá sér víti undir lokin. Argentínumaðurinn Lionel Messi sá hins vegar til þess að Barcelona vann 4-0 sigur. Kolbeinn skoraði tvö mörk um helgina og fær vonandi stórt hlutverk.

AC Milan vann 2-0 sigur á Celtic í fyrstu umferð. Mario Balotelli verður í sviðsljósinu á móti Kolbeini og félögum enda getur hann einbeitt sér að Meistaradeildinni þessa dagana enda í þriggja leikja banni í ítölsku deildinni.

Það er pressa á Jose Mourinho og lærsveina hans í Chelsea en þeir töpuðu á heimavelli á móti Basel í fyrstu umferð en heimsækja Steaua Búkarest í kvöld.

Aðalleikur dagsins á S2 Sport er leikur Arsenal og Napoli í London þar sem stjórarnir Arsene Wenger og Rafael Benitez mætast með sín lið sem bæði unnu í fyrstu umferð.

Leikur Ajax-AC Milan er á S2 Sport 3 og leikur Celtic-Barcelona er á S2 Sport 4. Þessir leikir hefjast allir klukkan 18.45 en á undan verður Hjörtur Hjartarson með upphitun og eftir leikinn fer hann yfir alla leiki kvöldsins ásamt sérfræðingum sínum í Meistaramörkunum.