Tribute-tónleikar nýjasta æðið á Íslandi

„Þessi tribute kvöld hafa alveg slegið í gegn hjá okkur og hafa verið þau mest sóttu að undanförnu, fyrir utan stærstu nöfnin í tónlistinni í dag. Skálmöld fyllir auðvitað alltaf húsið og Retro Stefson líka, til að nefna dæmi, en þessi kvöld hafa oft komist mjög nálægt þeim í aðsóknartölum," segir Eiríkur Rósberg Eiríksson á Gamla Gauknum.

Gamli Gaukurinn hefur hýst fjöldann allan af tribute-tónleikum á undanförnum mánuðum og virðist engin lognmolla ætla að verða þar á næstunni. Eiríkur segir það vera mismunandi hvort þeir á Gamla Gauknum hafi frumkvæði að tónleikum og setji saman hljómsveit eða hvort komið sé að máli við þá um að fá að halda tónleika. „Stundum koma líka bönd sem leita til okkar eftir góðum hugmyndum um hvaða bönd ætti að taka fyrir," segir hann.

Nú þegar eru tribute-tónleikar skipulagðir í næstum hverri viku vel fram í júní á Gamla Gauknum. Meðal sveita sem þar verða teknar fyrir eru Pearl Jam, Guns N' Roses, Kiss, Rage Against The Machine og Alice in Chains. „Svo erum við líka að vinna í að setja upp Jeff Buckley tribute-tónleika og jafnvel Amy Winehouse," segir Eiríkur.

Foo Fighters tribute í kvöld

Í kvöld verður rokkbandið Foo Fighters í fyrirrúmi á Gamla Gauknum í tilefni þess að tíu ár séu liðin frá því að sveitin hélt sína fyrstu tónleika hér á Íslandi.

Það er bandið FooIce sem annast flutninginn og fer þar í broddi fylkingar Arnar „rokk" Friðriksson, sem ætlar að feta í fótspor Daves Grohl og annast sönginn á tónleikunum. Margir muna ef til vill eftir honum frá því hann lenti í öðru sæti í raunveruleikaþáttunum Bandið hans Bubba, á eftir Eyþóri Inga.

Ásamt Arnari skipa bandið þeir Kristján Grétarsson, Dave Dunn, Birgir Kárason og Benedikt Brynleifsson.