ABBA mögulega saman á ný

Svo gæti farið að sænska hljómsveitin ABBA komi saman á nýjan leik á næsta ári en þá eru 40 ár liðin frá því að sveitin steig fram á sjónarsviðið í Eurovision.

Hingað til hefur endurkoma sveitarinnar strandað á söngkonunni Agnöthu Faltskog sem hefur ekki viljað koma saman. En nú er komið annað hljóð í hana, ef marka má viðtal sem þýska blaðið Welt am Sonntag tók við hana á dögunum.

„Auðvitað er það eitthvað sem við erum að hugsa um,“ segir hún um mögulega endurkomu sveitarinnar. „Það er á dagskránni að halda upp á afmælið, en hvernig við ætlum að gera það get ég ekki sagt til um.“ 

Hljómsveitin ABBA hóf göngu sína árið 1972 en í henni voru þau Agnetha og Björn Ulvaeus, sem síðar giftust, og Benny Andersson og Anni-Frid Lyngstad, sem giftu sig líka.

Hljómsveitin vann svo Eurovision árið 1974 með laginu Waterloo sem er löngu orðið heimsfrægt - eins og nánast öll lög ABBA.

Hér fyrir neðan má heyra flutning ABBA í Eurovision árið 1974.