Vilja taka ríkisborgararéttinn af framherjanum eftir landsliðsvalið

Forsvarsmenn Knattspyrnusambands Brasilíu hafa lýst yfir vilja sínum til þess að framherjinn Diego Costa verði sviptur ríkisborgararétti sínum.

Framherjinn 25 ára hjá Atletico Madrid, sem er markahæsti leikmaðurinn í spænsku úrvalsdeildinni, vakti undrun landa sinna á dögunum þegar hann lýsti yfir vilja sínum til að spila fyrir hönd Spánar.

Costa spilaði tvo æfingaleiki með landsliði Brasilíu fyrr á árinu en fékk svo spænskan ríkisborgararétt í sumar. Í september spurðist Knattspyrnusamband Spánar fyrir um leyfi hjá Alþjóðaknattspyrnusambandinu, FIFA, til að velja Costa í landsliðið.

Costa staðfesti loks vilja sinn á þriðjudaginn þegar hann sendi Knattspyrnusambandi Brasilíu bréf. Bréfið vakti reiði og meðal þeirra sem tjáðu sig var landsliðsþjálfarinn Luiz Felipe Scolari:

„Brasilískur leikmaður sem neitar að klæðast treyju þjóðar sinnar og spila á heimsmeistaramótinu dregur sig sjálfkrafa úr keppni. Hann snýr baki við draumi milljóna, að spila fyrir hönd þjóðar sinnar, fimmföldum heimsmeisturum á heimavelli í Brasilíu.“

Forsvarsmaður Knattspyrnusambands Brasilíu segir ákvörðun Costa klárlega vera fjárhagslegs eðlis. Nú sé næst í stöðunni að svipta hann ríkisborgararéttinum sem hann hafi í raun hafnað að þeirra mati. Lögfræðingur á vegum sambandsins er að skoða málið fyrir þess hönd.

Fái Costa leyfi til þess að spila fyrir hönd Spánar gæti hann mætt „löndum sínum“ á HM í Brasilíu næsta sumar. Telja má líklegt að leyfið fáist sé horft til þess að Aron Jóhannsson, sem einnig hafði tvöfalt ríkisfang en hafði leikið með yngri landsliðum Íslands, fékk grænt ljós á að spila fyrir hönd Bandaríkjanna. Aron hafði þó ekki spilað æfingaleiki fyrir A-landsliðið líkt og Costa.