Keflvíkingar áfram taplausir í karlakörfunni - úrslit kvöldsins

Keflavík og Grindavík unnu örugga sigra í leikjum sínum í Dominos-deild karla í körfubolta í kvöld. Keflavík vann 18 stiga sigur á Val, 94-76, í Vodafone-höllinni á Hlíðarenda en kanalausir Grindavíkingar unnu á sama tíma 25 stiga heimasigur á ÍR, 98-73.

Grindavík var komið í 35-17 eftir fyrsta leikhluta og vann sannfærandi sigur á ÍR. ÍR-ingar unnu annan leikhlutann 26-15 og komu sér aftur inn í leikinn en sigur Grindavíkurliðsins var aldrei í mikilli hættu í seinni hálfleiknum.

Jóhann Árni Ólafsson átti frábæran leik með Grindavík sem er enn að bíða eftir nýjum Bandaríkjamanni. Jóhann Árni var með 29 stig, 8 fráköst og 6 stoðsendingar í kvöld en Sigurður Gunnar Þorsteinsson bætti við 21 stigi, 9 fráköstum og 6 stoðsendingum. Sveinbjörn Claessen var stigahæstur hjá ÍR með 19 stig.

Keflvíkingar eru áfram með fullt hús og Valsmenn eru enn án stiga eftir að Keflavík vann 18 stiga sigur á Val á Hlíðarenda. Valsmenn unnu fyrsta leikhlutann 21-19 en frábær annar leikhluti (31-18) færði Keflavíkurliðinu frumkvæðið sem liðið hélt síðan út leikinn.

Michael Craion var með tröllatvennu (21 stig og 21 frákast) og næstir honum í stigaskori voru þeir Arnar Freyr Jónsson (19 stig, 6 stoðsendingar og 5 stolnir ) og Darrel Keith Lewis (16 stig). Ragnar Gylfason skoraði 20 stig fyrir Val og Chris Woods var með 14 stig.



Úrslit og stigaskor í leikjum kvöldsins:

Grindavík-ÍR 98-73 (35-17, 15-26, 24-16, 24-14)

Grindavík: Jóhann Árni Ólafsson 29/8 fráköst/6 stoðsendingar, Sigurður Gunnar Þorsteinsson 21/9 fráköst/6 stoðsendingar, Þorleifur Ólafsson 15/5 fráköst, Jón Axel Guðmundsson 9/7 fráköst/5 stoðsendingar, Ómar Örn Sævarsson 7/6 fráköst, Hilmir Kristjánsson 6, Ólafur Ólafsson 4/5 fráköst, Ármann Vilbergsson 3, Jens Valgeir Óskarsson 2, Daníel Guðni Guðmundsson 2.

ÍR: Sveinbjörn Claessen 19/7 fráköst/5 stolnir, Hjalti Friðriksson 15/10 fráköst, Terry Leake Jr. 14/12 fráköst, Björgvin Hafþór Ríkharðsson 9/5 fráköst, Ragnar Örn Bragason 5, Birgir Þór Sverrisson 5, Matthías Orri Sigurðarson 4, Dovydas Strasunskas 2.



Valur-Keflavík 76-94 (21-19, 18-31, 13-21, 24-23)

Valur: Ragnar Gylfason 20/4 fráköst, Chris Woods 14/7 fráköst, Rúnar Ingi Erlingsson 12, Birgir Björn Pétursson 11/4 fráköst, Guðni Heiðar Valentínusson 6/4 fráköst, Benedikt Blöndal 5, Oddur Ólafsson 3, Kristinn Ólafsson 2, Hlynur Logi Víkingsson 2, Benedikt Skúlason 1.

Keflavík: Michael Craion 21/21 fráköst/3 varin skot, Arnar Freyr Jónsson 19/6 stoðsendingar/5 stolnir, Darrel Keith Lewis 16/4 fráköst, Þröstur Leó Jóhannsson 9, Gunnar Ólafsson 9, Guðmundur Jónsson 6, Andri Daníelsson 5, Hafliði Már Brynjarsson 3, Ragnar Gerald Albertsson 2, Valur Orri Valsson 2/10 stoðsendingar, Almar Stefán Guðbrandsson 2.