Birki hrósað í hástert

Tenniskappinn Birkir Gunnarsson vann á dögunum sigur í sínu fyrsta móti í Bandaríkjunum. Birkir keppir fyrir Graceland University í Iowa.

Birkir vann sigur í öllum sex leikjum sínum á mótinu og tapaði ekki setti. Sigurinn tryggði honum keppnisrétt á ITA Nationals minni háskólanna vestanhafs en keppt verður á Flórída í október.

„B-Gunn… Frábært mót! Þú hélst einbeitingu í gegnum mótið og lagðir marga sterka leikmenn að velli!!“ sagði Monreo Walker aðalþjálfari hjá Graceland University.

„Þú stóðst þig með sóma fyrir hönd Graceland og áttir titilinn skilinn,“ sagði Walker og óskaði Birki góðs gengis í Flórída.

Birkir er Íslandsmeistari í karlaflokki en hann lagði Raj Bonifacius í úrslitaleiknum í ágúst. Hann er fæddur árið 1991.