Liverpool vann Vålerenga í fjörugum leik

Liverpool vann góðan sigur á Vålerenga í æfingaleik liðanna í Noregi í kvöld. Liverpool vann 4-1 eftir að hafa verið 2-1 yfir í hálfleik. Leikurinn var fjörugur og bauð upp á fjölda færi.

Fjórir leikmenn skoruðu fyrir Liverpool-liðið í kvöld en það voru þeir Luis Alberto, Iago Aspas, Martin Kelly og Raheem Sterling. 21 leikmaður Liverpool fékk í það minnsta 45 mínútu í Osló í kvöld.

Luis Alberto skoraði fyrsta markið á 31. mínútu en Giancarlo González jafnaði fjórum mínútum síðar eftir horn. Iago Aspas kom Liverpool aftur yfir á 44. mínútu eftir sendingu frá Stewart Downing.

Martin Kelly kom Liverpool í 3-1 á 54. mínútu eftir hornspyrnu frá Philippe Coutinho. Raheem Sterling skoraði fjórða markið í uppbótartíma eftir sendingu frá Oussama Assaidi en Coutinho átti líka mikinn þátt í markinu.