Hamilton þarf að vara sig á hrekkjum

Þeir Lewis Hamilton og Nico Rosberg munu aka fyrir Mercedes-liðið á þessu keppnistímabili sem liðsfélagar. Það er ekki í fyrsta sinn sem þeir félagar aka fyrir sama liðið því fyrir þrettán árum kepptu þeir saman í gó-karti.

Þá léku þeir sér að því að hrekkja hvorn annan og virðist sá háttur vera hafður á aftur núna hjá Mercedes. Rosberg hefur nefninlega varað Hamiton opinberlega við yfirvofandi hrekk. „Það hefur ekkert enn gerst en ég veit að það mun gefast tími til þess," sagði Rosberg sem hefur líklega ekki þorað að hrekkja sinn gamla liðsfélaga, Michael Schumacher.

„Það er gott að vinna með Lewis á ný og rifja upp góðar minningar. Það er liðinn langur tími síðan síðast og það verður rosalegt verkefni að keppa við hann innan liðsins."