Írar samþykkja að gera risabankann IBRC gjaldþrota

Samþykkt var með miklum meirihluta í nótt á írska þiningu að lýsa risabankann IBRC gjaldþrota.

Bankinn var reistur á rústum Anglo Irish Bank og sparisjóðsins Irish Nationwide Building Society. Með því að lýsa bankann gjaldþrota vonast írsk stjórnvöld til þess að létta mjög á skuldabyrði ríkisins en seðlabanki Evrópu á eftir að samþykkja þessa ráðstöfun.

Bankinn hefur reynst Írum þungur baggi en írsk stjórnvöld skuldbundu sig til að greiða rúmlega 3 milljarða evra á ári fram til ársins 2023 til að fjármagna bankann. Í heild hefði þetta kostað írska ríkið um 36 milljarða evra eða yfir 6.000 milljarða króna.

Á vefsíðu BBC er haft eftir Enda Kenny forsætisráðherra Írlands að það hafi löngu verið orðið tímabært að láta þennan banka hverfa úr fjármálalandslagi Írlands. Ef kostnaðurinn við að endurreisa írska bankakerfið hefði ekki komið til væri opinber skuldastaða Írlands betri en Þýskalands.