Valskonur Íslandsmeistarar í futsal kvenna

Svava Rós Guðmundsdóttir tryggði Valskonum Íslandsmeistaratitilinn í innanhússknattspyrnu, futsal, þegar hún skoraði sigurmarkið þremur sekúndum fyrir leikslok í dramatískum 6-5 sigri á ÍBV í úrslitaleik í Laugardalshöllinni í dag. ÍBV komst í 5-2 í úrslitaleiknum en Valskonur skoruðu fjögur mörk á síðustu fimm mínútum leiksins.

Eyjakonur áttu titil að verja og það leit allt út fyrir það að þær væru á leiðinn til Eyja með bikarinn þegar þær komust í 5-2 í seinni hálfleiknum. Valsliðið gafst hinsvegar ekki upp og Svava Rós Guðmundsdóttir skoraði tvö síðustu mörk liðsins í leiknum.

Elísa Viðarsdóttir skoraði fyrsta mark ÍBV-liðsins eftir tæpar sjö mínútur en staðan var 1-1 í hálfleik eftir að Telma Ólafsdóttir jafnaði leikinn tveimur mínútum síðar.

Svana Rún Hermannsdóttir kom Val yfir í upphafi seinni hálfleiks en það tók Sigríði Láru Garðarsdóttur og Sóleyju Guðmundsdóttur aðeins 24 sekúndur að koma ÍBV aftur yfir í 3-2.

Hlíf Hauksdóttir og Elísa kom Eyjaliðinu síðan þremur mörkum yfir, 5-2, þegar aðeins rúmlega sex mínútur voru eftir af leiknum.

Það dró hinsvegar af Eyjaliðinu á lokakaflanum. Dóra María Lárusdóttir minnkaði muninn fjórum og hálfri mínútu fyrir leikslok og Valskonur jöfnuðu síðan með tveimur mörkum á sex sekúndum. Elín Metta Jensen skoraði það fyrra en Svava Rós Guðmundsdóttir það síðara.

Valsliðið hélt áfram að pressa og Svava Rós Guðmundsdóttir skoraði síðan sigurmarkið þegar aðeins 3,32 sekúndur voru eftir á klukkunni. Valsliðið spilaði á fleiri mönnum og átti mun meira eftir í lokin.

Valur-ÍBV 6-5 (1-1)

0-1 Elísa Viðarsdóttir (13:09)

1-1 Telma Ólafsdóttir (11:39)

- Hálfleikur -

1-2 Svana Rún Hermannsdóttir (18:21)

2-2 Sigríður Lára Garðarsdóttir (18.08)

2-3 Sóley Guðmundsdóttir (17;57)

2-4 Hlíf Hauksdóttir (7:02)

2-5 Elísa Viðarsdóttir (6:08)

3-5 Dóra María Lárusdóttir (4:31)

4-5 Elín Metta Jensen (1:53)

5-5 Svava Rós Guðmundsdóttir (1:47)

6-5 Svava Rós Guðmundsdóttir (0:03)