Spænsk stjórnvöld tæma varasjóð til kaupa á skuldabréfum

Stjónvöld á Spáni hafa nýtt sér einn stærsta varasjóð landsins til kaupa á eigin ríkisskuldabréfum. Sjóð þessum er annars ætlað að tryggja lífeyrisgreiðslur til eldri borgara Spánar í framtíðinni.

Fjallað er um þetta mál í Wall Street Journal en þar segir að spænsk stjórnvöld séu þar að auki farin að draga sér lausafé úr sjóðnum. Að vísu er orðið lítið eftir af slíku.

Áður en skuldabréfakaupin hófust var sjóður þessi 65 milljarðar evra að stærð eða um 11.000 milljarðar króna. Á síðustu árum hafa 90% af þessari upphæð farið í kaup á spænskum ríkisskuldabréfum. Slík kaup teljast vafasöm fjárfesting þar sem lánshæfiseinkunn Spánar er aðeins einu stigi frá ruslflokki hjá Moody´s og Standard & Poor´s.

Wall Street Journal ræðir við formann hjá stórum samtökum ellilífeyrisþega sem segir að þeir hafi miklar áhyggjur af því hvernig þessi sjóður þeirra hafi verið notaður af stjórnvöldum.

Spænskur hagfræðiprófessor sem rætt er við er á annarri skoðun. Hann segir að þarna séu stjórnvöld aðeins að færa fé úr einum vasa sínum og yfir í annan.