Þórir til Þýskalands

Tónlistarmaðurinn Þórir Georg sendir frá sér plötuna I Will Die & You Will Die & It Will be Alright á morgun, föstudag, á vegum Kimi Records.

Í dag heldur Þórir hins vegar í tveggja vikna tónleikaferð um Þýskaland, en platan kemur út samtímis þar í landi hjá þýska útgáfufélaginu Stargazer Records.

I Will Die & You Will Die & It Will be Alright er persónuleg plata þar sem Þórir kemur einn að verkinu. Hann tekur upp og hljóðblandar, hljómjafnar og sér um hönnun á umslagi. Lögin flakka milli þess að vera þung og drungaleg rokktónlist yfir í glettna og persónulega tónlist þar sem rödd og gítarleikur Þóris fá að njóta sín.