Arftaki Guðmundar kynntur í næstu viku

Einar Einarsson, formaður landsliðsnefndar HSÍ, staðfesti við Fréttablaðið í gær að nýr landsliðsþjálfari karlalandsliðsins yrði tilkynntur í næstu viku.

Eins og kunnugt er hefur Guðmundur Þórður Guðmundsson látið af störfum eftir fjögur ótrúleg ár þar sem liðið vann til tveggja verðlauna á stórmótum.

„Við erum að vinna í þessu á fullu. Erum að setja saman teymi og við munum væntanlega boða til fundar í næstu viku þar sem nýr þjálfari verður kynntur," sagði Einar.

Hann bætti við að áhersla væri lögð á að halda sem flestum sem hafa verið í landsliðsþjálfarateyminu.