Eitt stórt reikningsdæmi í lok kvölds

Það gæti þurft dágóðan tölfræðiútreikning eftir lokaumferð Iceland Express-deildar karla í kvöld en þá verður barist bæði um annað sætið og síðasta sætið inn í úrslitakeppnina. Sjö lið hafa tryggt sér sæti inn í úrslitakeppnina en enginn veit hverjir mæta

Grindavík er deildarmeistari og Valur og Haukar eru fallin lið en það er samt nóg undir í 22. og síðustu umferð Iceland Express-deildar karla í körfubolta í kvöld.

Þrjú lið eiga möguleika á öðru sætinu og auk þess gætu Keflvíkingar nælt í heimavallarrétt ef úrslitin verða KR-ingum óhagstæð.

Njarðvík situr eins og er í áttunda og síðasta sætinu inn í úrslitakeppnina en Fjölnismenn eiga smá von um að taka það af þeim.

ÍR-ingar eiga aftur á móti ekki lengur möguleika á sæti í úrslitakeppninni þar sem liðið verður alltaf neðar á lakari árangri í innbyrðisviðureignum við Njarðvík (og Fjölni).

KR gæti farið niður í 5.sætiKR, Stjarnan og Þór eru öll með 28 stig í 2. til 4. sæti deildarinnar og eiga því öll möguleika á því að ná öðru sætinu í kvöld. KR-ingar eiga það á hættu að detta niður um þrjú sæti í töflunni verði úrslitin þeim óhagstæð. Stjarnan og Þór verða aftur á móti með heimavallarrétt í átta liða úrslitunum hvernig sem fer í kvöld.

Ástæðan fyrir þessu er að KR-ingar eru með lakari innbyrðisstöðu á móti Keflavík en Keflvíkingar eru hins vegar með lakari innbyrðisárangur á móti bæði Þór og Stjörnunni.

Eina leiðin til þess að Keflvíkingar nái heimavallarrétti í átta liða úrslitunum er að þeir vinni sinn leik, KR tapi sínum leik og bæði Stjarnan og Þór vinni sína leiki. Fari svo yrði Keflavík í 4. sætinu en KR-ingar dyttu alla leið niður í 5. sætið.

Grindavík og Snæfell eru og verða áfram í 1. og 6. sæti hvernig sem fer í kvöld en það á síðan eftir að koma í ljós hvernig hin liðin raða sér upp inn í úrslitakeppnina.

Hvað gerist í Síkinu?Baráttan um síðasta sætið inn í úrslitakeppnina stendur á milli tveggja liða, Njarðvíkina og Fjölnis. Það ræðst mjög mikið á leik Tindastóls og Njarðvíkur í Síkinu á Sauðárkróki

Njarðvík er í betri stöðu og tryggir sig áfram með sigri á Tindastól en Fjölnismenn þurfa aftur á móti að treysta á önnur úrslit auk þess að klára sinn leik.

Það er mikið um að liðin í efri hlutanum séu að keppa við liðin í neðri hlutanum en það er eitthvað undir í öllum leikjum nema leik Vals og Snæfells í Vodafonehöllinni. Í tveimur þeirra eru síðan bæði lið að keppa um að bæta stöðu sína en það er í leik Fjölnis og Keflavíkur í Dalhúsum og leik Tindastóls og Njarðvíkur á Sauðárkróki.

KR-ingar og Stjörnumenn eiga þó örugglega ekki auðvelda leiki fyrir höndum, í Grindavík og Seljaskóla, þótt heimaliðin hafi að engu að keppa. Þórsarar heimsækja síðan Hauka á Ásvelli en þetta verður síðasti úrvalsdeildarleikurinn í Hafnarfirði í dálítinn tíma. Allir leikir kvöldsins hefjast kl. 19.15.

Lokaumferðin ætti að bjóða upp á spennu allt til loka leikjanna og virka sem fín upphitun fyrir úrslitakeppnina sem bíður handan við hornið.

Ef allt gengur upp hjá liðunum í lokaumferðinni

Grindavík 36 stig

Grindvíkingar eru orðnir deildarmeistarar og úrslit kvöldsins skipta þá engu máli.

KR 28 stig

Getur náð öðru sætinu með því að vinna ÍR og verða alltaf í 2. sæti á betri árangri í innbyrðisleikjum ef þeir eru jafnir Þór og Stjörnunni.

Stjarnan 28 stig

Getur náð öðru sætinu með því að vinna Grindavík á sama tíma og KR tapar sínum leik. Stjarnan er með betri innbyrðisstöðu á móti Þór úr Þorlákshöfn.

Þór Þorlákshöfn 28 stig

Getur náð öðru sætinu með því að vinna Hauka á útivelli á sama tíma og bæði KR og Stjarnan tapa sínum leikjum.

Keflavík 26 stig

Getur náð fjórða sætinu með því að vinna Fjölni á útivelli á sama tíma og KR tapar fyrir ÍR en bæði Stjarnan og Þór vinna sína leiki.

Snæfell 24 stig

Verður í sjötta sæti hvernig sem aðrir leikir fara. Getur náð Keflavík að stigum en Hólmarar eru með lakari árangur í innbyrðisleikjum eftir tvö naum töp.

Tindastóll 20 stig

Er komið inn í úrslitakeppnina og verður í sjöunda sæti svo framarlega sem liðið tapar ekki með meira en sjö stigum á móti Njarðvík í kvöld.

Njarðvík 18 stig

Getur náð sjöunda sætinu með því að fá átta stiga sigur (eða stærri) á Tindastól en tryggir sér sæti í úrslitakeppninni með sigri.

ÍR 16 stig

Getur ekki náð áttunda sætinu af því að liðið er með lakari innbyrðisárangur en Njarðvík auk þess að vera ekki með bestan árangur verði öll þrjú liðin jöfn.

Fjölnir 16 stig

Getur náð áttunda sætinu ef liðið vinnur Keflavík á sama tíma og bæði ÍR og Njarðvík tapa sínum leikjum. Fjölnir er með betri árangur í innbyrðisleikjum á móti Njarðvík.

Haukar (12 stig) og Valur (0 stig)

Bæði eru fallin í 1. deild.