Nafngreind í The Guardian

Fréttablaðið greindi frá því í ágúst að breska söngkonan Beth Orton hefði beðið leikstjórana Árna & Kinski og stílistann Hrafnhildi Hólmgeirsdóttur um að vinna tónlistarmyndband fyrir sig.

Myndbandið var frumsýnt á vefsíðu The Guardian á miðvikudag og þar eru Árni & Kinski og Hrafnhildur öll nafngreind. Ætla má að slík nafnbirting muni auka hróður Hrafnhildar og leikstjóranna tveggja enda þykir myndbandið vel heppnað og The Guardian er lesið um heim allan.

Orton ræddi einnig um myndbandið við tónlistartímaritið Rolling Stone þann 13. ágúst og segist þar hafa sótt innblásturinn að myndbandinu til fugla er sátu fyrir utan glugga hennar einn dag.