Umfjöllun og viðtöl: Valur - Þór/KA 2-2 | Norðankonur stálu stigi

Tvö mörk á síðustu tuttugu mínútunum tryggðu toppliði Þór/KA 2-2 jafntefli gegn Val á Hlíðarenda. Valskonur réðu lögum og lofum á vellinum en ólíkt gestunum nýttu þær ekki færi sín.

Valskonur voru fljótar að ná undirtökunum í leiknum og áttu tvö hættuleg færi í byrjun leiks sem fóru forgörðum.

Fyrst var það Rakel Logadóttir sem slapp ein í gegn en fór illa að ráði sínu og síðar skaut Dagný Brynjarsdóttir yfir af markteig eftir frábæran undirbúning dönsku landsliðskonunnar Johönnu Rasmussen.

Valsarar héldu boltanum meira innan liðsins á meðan Þór/KA beitti skyndisóknum með litlum árangri í fyrri hálfleik.

Johanna Rasmussen opnaði markareikning sinn fyrir Val og kom Valskonum yfir undir lok fyrri hálfleiks með góðum skalla eftir frábæran undirbúning Rakelar. Valskonur fóru því sáttar inn í leikhlé með verðskuldaða forystu.

Forysta Valskvenna tvöfaldaðist á 55 mínútu með sjálfsmarki fyrirliðans Örnu Sifjar Ásgrímsdóttur snemma í síðari hálfleik. Dagný Brynjarsdóttir átti þá fyrirgjöf sem breytti um stefnu af Örnu og hafnaði í netinu.

Eftir mörkin var einungis eitt lið á vellinum þar sem Valur stjórnaði leiknum og virtist vera með leikinn algjörlega í höndum sér.

Það var því þvert gegn gangi leiksins þegar Katrín Ásbjörnsdóttir minnkaði muninn úr vítaspyrnu eftir klaufalegt brot.

Valur hélt áfram að stjórna leiknum og skapaði sér ágætis færi sem tókst ekki að nýta. Þegar rúmar tíu mínútur voru eftir af leiknum jafnaði varamaðurinn Lillý Rut leikinn eftir snarpa sókn og laglega afgreiðslu.

Á lokamínútum leiksins fékk Svava Rós varamaður í liði Vals gott færi en eins og nokkur önnur færi liðisns fór það forgörðum.

Norðankonur ganga sáttar frá borði með eitt stig og halda sæti sínu á toppi deildarinnar þar sem Blikar töpuðu gegn ÍBV. Þær sýndu mikinn karakter með því að vera tveimur mörkum undir en ganga af velli með jafntefli og gefast aldrei upp.

Valsarar geta nagað sig í handarbakið eftir að tapa niður ágætri stöðu á heimavelli í leik sem þær stjórnuðu frá upphafi til enda.

Gunnar Rafn: Klárlega tvö töpuð stigGunnar Rafn Borgþórsson þjálfari Vals var ekki jafn sáttur. „Þetta eru klárlega töpuð stig í dag, þú sást það."

Valur var betri aðilinn en náði ekki að nýta færin.

„Þær fengu tvö færi í seinni og nýttu þau. Við vorum í raun klaufar að gefa þeim þessi færi. Við gefum ódýra vítaspyrnu og gleymum okkur í hinu færinu sem þær skoruðu úr. Við áttum góð færi sem við hefðum átt að nýta betur. Þú átt ekki að tapa leik sem þú ert komin tveimur mörkum yfir í og með þessa yfirburði. Þór/KA beitti sinni leikaðferð í dag sem er greinilega að virka fyrir þær."

Johanna Rasmussen átti góðan leik í liði Vals í dag og sýndi góða takta

„Johanna Rasmussen er frábær leikmaður og kemst í hóp þeirra bestu sem spilað hafa hér á landi, eins og margar sem spila í Vals-liðinu í dag" sagði Gunnar.

Jóhann Kristinn: Staðan í deildinni er bull miðað við frammistöðu ValsJóhann Kristinn, þjálfari Þór/KA, var sáttur með stigið í dag.

„Mér finnst mjög gott að koma hingað og ná í stig. Þetta var frábært lið sem við vorum að spila við og staðan í deildinn er algjört bull miðað við frammistöðu þeirra hér í dag," sagði Jóhann Kristinn.

Sænskur leikmaður, Rebecca Johnson, gekk til liðs við Þór/KA í dag en var ekki komin með leikheimild í tæka tíð fyrir leikinn.

„Félagið sem hún spilaði fyrir lenti í fjárhagsvandræðum og pappírsvinnan gekk erfiðlega úti. Því miður erum við búnir að vera í nokkra daga að ganga frá þessu en það hafðist í hádeginu og hún verður með í næsta leik."

Þór/KA fær engin verðlaun fyrir fallegan fótbolta í dag en markviss var hann og skilaði þeim góðu stigi.

„Það er rosaleg erfitt að fara eitthvað að blammera stelpurnar mínar og í raun hef ég engin efni á því. Við erum að koma á erfiðan útivöll og hann bíður upp á að útiliðið geri fullt af mistökum. Valur fer á flug eftir fyrra markið sitt og býr yfir miklum gæðum eins og í Johönnu Rasmussen. Þegar það gerist er rosalega erfitt fyrir svona ungt lið að standa vaktina. En að koma til baka finnst mér sýna að þær eru að taka stór stökk upp á við og karakterinn sem þær eru að sýna er til fyrirmyndar."

Dóra María: Markmaður þeirra bjargaði þeim oft„Mér fannst við miklu betri, sköpuðum fleiri færi og héldum þokkalega í vörninni. Ég held að þær hafi ekki fengið mikið meira en þessi tvö færi sem þær skora úr," sagði Dóra María Lárusdóttir, fyrirliði Vals, nokkuð svekkt eftir leikinn.

„Við fengum marga opna sénsa og fín skotfæri en markmaður þeirra bjargaði þeim oft. Þetta voru mikil vonbrigði," bætti hún við.