Coulthard segir Schumacher geta unnið í Montréal

Kanadíski kappaksturinn fer fram um næstu helgi í Montréal. Brautin liggur á manngerðri eyju sem byggð var í tengslum við Ólympíuleikana þar 1976. Árið 1978 var fyrsti kanadíski kappaksturinn haldinn á brautinni því Mosport-brautin, þar sem kappaksturinn hafði áður verið haldinn, var talin of hættuleg.

David Coulthard, fyrrum ökumaður í Formúlu 1, segir að Michael Schumacher geti vel unnið mótið í Kanada. Schumacher var fljótastur í tímatökum fyrir Mónakókappaksturinn fyrir tæpum tveimur vikum og mætir því til Kanada fullur sjálfstrausts.

Veggirnir umhverfis brautina liggja mjög nálægt malbikinu sem gerir hana nokkuð snúna. Brautin er ekki líkamlega erfið fyrir ökumennina en missi þeir einbeitingu í örskamma stund mun brautin sjá til þess að þeir aki ekki lengra. Árið 1999 fékk til dæmis veggurinn sem umlykur síðustu beygjuna fyrir ráskaflann viðurnefnið „Veggur meistaranna", því á hann óku þrír heimsmeistarar í kappakstrinum. Þeir Damon Hill, Jacques Villeneuve og Micheal Schumacher.

Kappaksturinn í Kanada í fyrra verður lengi í minnum hafður því sá stóð lengst allra móta í sögu mótaraðarinnar. Mikil rigning gerði það að verkum að kappakstrinum var hætt þegar þó nokkrir hringir voru eftir og hann ræstur aftur þegar talið var að aðstæðurnar væru boðlegar fyrir Formúlu 1.

Jenson Button kom þá fyrstur í mark eftir að hafa tekið fram úr Sebastian Vettel á síðasta hring. Sá síðarnefndi hafði leitt kappaksturinn af ráspól en gerði mistök sem leiddu hann í ógöngur.

Mikilvægustu beygjurnar í brautinni eru beygjur 10, 13 og 14. Beygja 10 er U-beygja sem leiðir menn inn á langan beinan og hraðan kafla. Mikilvægt er að ná henni rétt því á beina kaflanum mega ökumenn nota DRS-vænginn til að komast fram úr. Beygjur 13 og 14 eru ekki síður mikilvægar. Þær eru mjög þröngar og hemlunarsvæðið fyrir þær er mjög snúið. Beygja 14 er síðasta beygja brautarinnar og leiðir menn inn á ráskaflann þar sem DRS-kerfið er einnig leyfilegt.

Þó nokkrar líkur eru á því að það rigni á Formúlu 1 í Kanada. Það mun gera leikinn enn meira spennandi fyrir okkur áhorfendur.

DRS svæði: Á ráskaflanum öllum og á beina kaflanum milli beygja 10 og 13.

Dekkjagerðir í boði: Super-mjúk (option) og mjúk (prime)

Efstu þrír árið 2011:

1. Jenson Button - McLaren

2. Sebastian Vettel – Red Bull

3. Mark Webber – Red Bull

Allt mótið er í beinni útsendingu á Stöð 2 Sport.

Fimmtudagur:

14:00 Æfing 1

18:00 Æfing 2

Laugardagur:

13:55 Æfing 3

16:50 Tímataka

Sunnudagur:

17:40 Kanadíski kappaksturinn

Staðan í titilbaráttunni eftir sex umferðir

Ökumenn

1. Fernando Alonso - 76 stig

2. Sebastian Vettel - 73

3. Mark Webber - 73

4. Lewis Hamilton - 63

5. Nico Rosberg - 59

6. Kimi Raikkönen - 51

7. Jenson Button - 45

8. Roman Grosjean - 35

9. Pastor Maldonado - 29

10. Sergio Perez - 22

Bílasmiðir

1. Red Bull - 108 stig

2. McLaren - 108

3. Ferrari - 86

4. Lotus - 86

5. Mercedes - 61