Raikkönen sigurviss fyrir kappaksturinn í Barcelona

Lotus-ökuþórinn Kimi Raikkönen segist eiga möguleika á því að sigra spánska kappaksturinn um næstu helgi. Kimi varð annar á eftir heimsmeistaranum Sebastian Vettel í Barein fyrir tveimur vikum.

"Ég geri ráð fyrir að Lotus verði mjög samkeppnisfært í Barcelona," sagði Kimi. "Það verður mjög jafn kappakstur á milli toppliðanna. Þetta er eina brautin sem liðin hafa nú þegar ekið keppnisbílum sínum í ár."

"Sjáum til hvað gerist. Bíllinn hefur reynst mjög vel þar sem af er. Ég ætla að mæta til Barcelona með sigur í huga." Kimi segir Lotus liðið vera tilbúið til að sigra mót aftur eftir þó nokkra lægð undanfarin ár.

Liðið, sem þá keppti undir merkjum Renault, varð heimsmeistari með Fernando Alonso árin 2005 og 2006. Raikkönen hefur sigrað 18 mót á ferlinum. Síðast sigraði hann á Spa-brautinni í Belgíu fyrir Ferrari árið 2009.