Helgi Jónas hættur með Grindavík

Helgi Jónas Guðfinnsson, þjálfari Íslandsmeistara Grindavíkur, mun ekki þjálfa liðið áfram en hann hefur tilkynnt stjórn körfuknattleiksdeildar Grindavíkur að hann ætli að hætta með liðið. Þetta kemur fram á heimasíðu Grindavíkur.

Helgi Jónas hefur þjálfað Grindavíkurliðið undanfarin tvö tímabil en liðið vann 27 af 32 leikjum sínum á Íslandsmótinu í ár, 19 af 22 í deildarkeppnini og 8 af 10 í úrslitakeppninni.

Helgi Jónas varð á dögunum fyrsti þjálfari Grindavíkur í sextán ár til að gera liðið að Íslandsmeisturum en hann var leikmaður liðsins þegar liðið varð Íslandsmeistari undir stjórn Friðriks Inga Rúnarssonar árið 1996.



Hér fyrir neðan má sjá fréttina á umfg.is í kvöld.

"Helgi Jónas Guðfinnsson tilkynnti stjórn körfuknattleiksdeildar Grindavíkur í dag að hann óski eftir að hætta störfum með liðið sökum anna í vinnu sinni.

Aðilar skilja í mesta bróðerni en gífurleg ánægja var með störf Helga og árangurinn á þessu tímabili auðvitað hreint út sagt stórkostlegur þar sem sjálfur Íslandsmeistaratitillinn var rúsínan í pylsuendanum.

Stjórn kkd.umfg óskar Helga Jónasi alls hins besta í framtíðinni og hann mun örugglega snúa aftur einhvern tíma síðar.

Engin ákvörðun hefur verið tekin um eftirmann Helga.

Stjórn kkd.umfg."