Button hafnar fingri Vettels

Jenson Button vann ástralska kappasturinn um helgina örugglega og kynnti fyrir áhorfendum sitt persónulega merki sem er einfaldlega bókstafurinn "W" sem einfaldlega stendur fyrir "win".

Sebastian Vettel hafði gríðarlega yfirburði í mótum síðasta árs og á sitt eigið merki sem er einfaldlega vísifingur upp í loftið, merki fyrir fyrsta sætið. Button segist ætla að halda vísifingri Vettels í skefjum í mótum ársins.

"Ég á eftir að fullkomna merkið mitt," sagði Button. "Ég er að gera ráð fyrir að fá þónokkra æfingu í næstu mótum. Við höfum ekki áhuga á fingri Vettels í ár og ég vona að við getum einfaldlega hafnað honum."

Vettel brást vel við ásetningi Buttons og sagði fjölmiðlum hlæjandi: "Ég vil sigra og ég held að það sé ekki mjög langt þar til ég geri það aftur."

Liðin pakka nú saman í Ástralíu og færa sig yfir til Malasíu þar sem keppt verður á Sepang brautinni rétt fyrir utan höfuðborg landsins, Kúala Lúmpúr. Vettel er sannfærður um að Red Bull liðið geti veitt McLaren jafn mikla, ef ekki meiri, samkeppni og í Ástralíu.

"Það er enginn í vafa um að Jenson átti sigurinn í Ástralíu skilinn - við áttum ekki roð í hann - en leikurinn verður öðruvísi í Malasíu."