Engin formleg tilmæli um að minnka bankana

Kaupþingsmenn fengu engin formleg tilmæli á árinu 2008 um að bankinn skyldi minnka. Þetta fullyrti Hreiðar Már Sigurðsson, fyrrverandi forstjóri Kaupþings fyrir Landsdómi í dag. „Það voru engin formleg tilmæli, engir fundir eða minnisblöðð eða beinlínis óskir um að bankinn myndi minnka sig," sagði Hreiðar Már. Hins vegar hefðu Kaupþingsmenn fundið fyrir áhyggjum stjórnvalda af stöðu mála á árinu 2008.

Hreiðar Már lýsir minikreppunni árið 2006 þannig að íslensku bankarnir þrír hafi verið búnir að gefa út mikið af skuldabréfum á evrópskum markaði. Evrópskir markaðir hafi orðið mun verri hvað lánsfjármöguleika snerti og bankamenn hafi haft áhyggjur af því hvernig þeir hugðust endurfjármagna sig og standa í skilum. „Áhyggjurnar snerust fyrst og fremst um það," sagði Hreiðar Már.

Hreiðar Már sagði að bankinn hefði vaxið mjög mikið fram að þessu. Fyrst með sameiningu Kaupþins við Búnaðarbankann, en svo með yfirtöku á danska bankanum FIH árið 2004 og Singer og Friedlander í Bretlandi árið 2005. Eftir árið 2005 hafi ekki verið farið í fleiri yfirtökur. Til hafi staðið að fara í yfirtökur á hollenskum banka árið 2007 en hætt var við það árið 2008.

Hreiðar Már segist ekki nákvæmlega geta sagt til um það hvenær hann fór að hafa áhyggjur af stöðunni árið 2008. Framan af ári hafi staðan litið betur út og Kaupþing verið með ný innlán frá fjárfestum upp á 5,7 milljarða evra. Í vikunni áður en ríkið tók yfir 75% hlut í Glitni hafi Kaupþingsmenn talið að hægt væri að bjarga bankanum „Við töldum að við værum búnir að finna leiðina fyrir Kaupþing út úr þessari krisu," sagði Hreiðar Már.