Eignasala í Noregi hefði losað um 900 milljónir evra

Allan tímann sem ég var stjórnarmaður Glitnis þá var upp á lagt að draga úr kostnaði og hagræða, sagði Þorsteinn Már Baldvinsson, sem var stjórnarformaður Glitnis þegar bankinn hrundi. Hann sagði að þetta hefði verið gert með sölu eigna meðal annars og að segja upp 200 manns. Nánast hefði verið búið að ganga frá sölu eigna í Noregi til Nordea sem hefði losað um 900 milljónir evra. Það hefði ekki gengið eftir fall Lehman Brothers 15. september 2008.

Helgi Magnús Gunnarsson, varasaksóknari Alþingis, spurði Þorstein Má um það að hve miklu leyti hefði verið rætt um sameiningar í bankakerfinu 2008. Spurði Helgi Magnús meðal annars út í fund sem Þorsteinn Már átti með Björgólfi Guðmundssyni, þáverandi stjórnarformanni Landsbankans, og Tryggva Þór Herbertssyni sem var efnahagsráðgjafi forsætisráðherra á þeim tíma.

„Það var farið örstutt yfir það að kostnaður við rekstur íslensks bankakerfis væri of hár. Það var ekkert meira lagt í þennan fund," sagði Þorsteinn Már. Hann hafi litið svo á að það væri ekki áhugi hjá Landsbankanum að skoða sameiningar.