Samkomulag um afskriftir fasteignaskulda í höfn

Samkomulag sem snertir meira en milljón íbúa í Bandaríkjunum, sem eru eigendur fasteigna, hefur náðst á milli ríkja, lánastofnanna og yfirvalda um sátt vegna vandamála er tengist fasteignaskuldum.

Samkvæmt fréttum CNN í dag er talið að heildarvirði samkomulagsins sé meira en 26 milljarðar dollara, eða sem nemur ríflega 3.000 milljörðum króna. Það felst m.a. í stórfelldri niðurfellingu fasteignaskulda, en nákvæm útlistun á samkomulaginu liggur þó ekki fyrir.

New York ríki og Kalifornía voru síðustu ríkin til þess að samþykkja samkomulagið, en flest ríki Bandaríkjanna eiga aðild að samkomulaginu á grundvelli þess að þau eru í bakábyrgð fyrir ákveðna tegund fasteignalána.

Víða í ríkjum Bandaríkjanna eru skuldir fólks langt umfram virði eigna, á meðan einu veð lánastofnanna fyrir lánunum eru fasteignirnar sjálfar. Fyrir vikið hefur fólk freistast til þess að yfirgefa hús sín og byrja með tveir hendur tómar, án skulda. Bankarnir hafa í mörgum tilvikum afskrifa hluta skuldanna til þess að koma í veg fyrir að fólk yfirgefi hús sín, með tilheyrandi neikvæðum áhrifum á fasteignaverð.

Þá hefur einnig verið í gangi rannsókn á lánveitingum banka í Bandaríkjunum til fasteignakaupa. Hún miðar m.a. að því að upplýsa um hvort rétt hafi verið staðið samningsgerð þegar lánin voru veitt, en fjölmargir þeirra sem keyptu sér húsnæði með lánveitingum frá bandarískum bönkum, einkum árunum frá 2003 og fram á árið 2007, telja bankanna hafa svikið sig með ólögmætum samningum. Samkomulagið felur í sér að bankarnir skuldbinda sig til þess að koma til móts við skuldara og bæta tjón ef talið er að lög hafi verið brotin. Meðal banka sem eiga aðild að samkomulaginu eru JP Morgan Chase og Wells Fargo.