Þriðji Kaninn til liðs við Hauka

Karlalið Hauka í Iceland Express-deildinni hefur bætt við sig þriðja Bandaríkjamanninum fyrir seinni hluta mótsins. Leikmaðurinn heitir Aleek Pauline og er leikstjórnandi.

Pauline sem er 24 ára kemur frá Norfolk State University. Á lokaári hans hjá NSU skoraði hann tæp 9 stig, átti rúmar 5 stoðsendingar og tók 4 fráköst að meðaltali í leik. Pauline kom til landsins í gær og mætti á sína fyrstu æfingu í gærkvöldi. Þetta kemur fram á heimasíðu Hauka.

Fyrir eru Haukar með Kanana Hayward Fain og Christopher Smith í herbúðum sínum. Næsti leikur Hauka er á fimmtudaginn í Stykkishólmi gegn Snæfelli.

Í tæplega ársgömlu myndbandi hér fyrir ofan er rætt við Pauline þar sem hann m.a. gefur körfuknattleiksmönnum góð ráð í varnarleiknum.