Stewart gróðavænlegust

Fjármálatímaritið Forbes hefur útnefnt Kristen Stewart, aðalleikkonu Twilight-myndanna, þá gróðavænlegustu í kvikmyndabransanum.

Þetta hefur komið mörgum í opna skjöldu en formúla Forbes er ákaflega einföld; útreikningarnir byggjast einfaldlega á því hversu miklum gróða kvikmynd stjörnunnar skilar miðað við laun hennar.

Og þá er útkoman engin geimvísindi, Twilight-kvikmyndirnar hafa malað gull án þess að leikararnir hafi verið á svimandi háum launum. Fyrir hvern dollara sem Stewart fær greiddan þénar mynd hennar rúmlega 55 dollara. Sem verður að teljast ágætis fjárfesting.

Unnusti hennar, Robert Pattinson, verður að gera sér þriðja sætið að góðu, fyrir hvern dollara sem hann fær greiddan þénar mynd hans að meðaltali 39 dollara. Pattinson hefur auðvitað reynt fyrir sér í öðrum kvikmyndum utan Twilight sem draga þessa upphæð örlítið niður.

Í öðru sæti á lista Forbes er leikkonan Anne Hathaway sem halar inn 45 dollara á hvern dollara. Meðal annarra nafntogaðra leikara á listanum má nefna Daniel Radcliffe, Matt Damon og Robert Downey en Downey var eini leikarinn yfir þrítugu sem komst á þennan lista.

Forbes tók líka saman þá leikara sem taldir eru skila minnstum gróða og þar trónir Drew Barrymore í efsta sæti. Eddie Murphy fylgir svo fast á eftir.