Tónlistarblaðið Popp kynnir Poppskúrinn á Vísi

Popp kemur út með breyttu sniði í dag og leggur nú áherslu á tónlist en ekki dægurmál almennt eins og það hefur gert undanfarin misseri. Í staðinn fyrir að koma út mánaðarlega kemur Popp út aðra hverja viku með Fréttablaðinu.

Tónlistarmennirnir sem sitja fyrir á forsíðu Popps gleðja einnig lesendur og aðdáendur sína með tónlistarflutningi í Poppskúrnum hér á Vísi. Mugison flutti til að mynda þrjú lög sem nú eru aðgengileg hér á Vísi á slóðinni visir.is/popp.

Popp kom fyrst út í lok árs 2009 og hefur fjallað um íslenska dægurmenningu síðan þá. Forsíðuandlitin hafa verið fjölbreytt, allt frá Lilju Ingibjargar til Hauks í Diktu og þaðan frá Gunnari Nelson til Þorbjargar í Retro Stefson. Framvegis verða þetta aðeins tónlistarmenn og er af nægu að taka.