Umfjöllun og viðtöl: Valur - FH 26-26

FH-ingar voru öskureiðir út í dómaraparið Ingvar Guðjónsson og Jónas Elíasson í kvöld. Þeir dæmdu þá umdeilt víti í lokin sem Valur skoraði úr og nældi sér í stig. Lokatölur 26-26 í Vodafonehöllinni.

Flestum fannst, og þar á meðal mörgum Völsurum, að dæma hefði átt ruðning á Magnús Einarsson, leikmann Vals, er hann ruddist inn í vörn FH á lokasekúndunum og beint í fangið á Erni Inga Bjarkasyni.

Ingvar og Jónas ákvaðu aftur á móti að dæma víti. Úr því skoraði Sturla Ásgeirsson með lausu snúningsskoti. Ískaldur Sturla.

FH-ingar leiddu með þrem mörkum, 22-25, þegar aðeins fimm mínútur voru eftir og þeir geta einnig kennt sjálfum sér um hvernig fór.

FH-ingar spiluðu afar illa úr sínum spilum í lok leiksins og lokasóknirnar lélegar. Þeir gáfu færi á sér og það nýttu Valsmenn þó svo þeir hafi þurft hjálp frá dómurunum eftir leikinn.

FH var sterkari aðilinn nær allan leikinn og ef ekki hefði verið fyrir flottan leik Antons Rúnarssonar í fyrri hálfleik þá hefði FH slátrað leiknum í fyrri hálfleik. Anton var eini maðurinn með meðvitund hjá Val í fyrri hálfleik.

Í síðari hálfleik steig Sturla upp sem og Hlynur markvörður. Varnarleikur Vals einnig fínn þar sem Sigfús Sigurðsson var afar öflugur.

Ólafur Gústafsson var lengstum sá eini í FH-liðinu sem tók af skarið og Daníel Freyr var einnig fínn í markinu.

Sigfús líklega puttabrotinn

Sigfús Sigurðsson stóð fyrir sínu í vörn Vals í kvöld. Fastur fyrir og varði nokkur skot. Hann fékk einnig boltann í puttann og óttast er að puttinn sé brotinn.

"Þetta er ekkert til að tala um. Maður teipar þetta bara og málið er dautt," sagði Sigfús klettharður en hann virkar frískari með hverjum leik.

"Þú sérð það. Kallinn er farinn að hlaupa völlinn endana á milli. Skrokkurinn er í fínu lagi og ég er ánægður með stöðuna."

Sigfús sagði vissulega fínt að fá stigið en hann vildi meira.

"Við ætluðum okkur sigur en gerum allt of mikið af tæknifeilum. Ef við hefðum fækkað mistökunum hefðum við unnið leikinn. Engu að síður gott að fá stig úr því sem komið var."

Kristján: Þetta var ekki víti

"Ég held að það hafi nánast allir séð að þetta var ekki víti undir lokin. Því erum við eðlilega svekktir að hafa ekki fengið bæði stigin í dag," sagði Kristján Arason, þjálfari FH.

"Engu að síður hefðum við getað gert betur í lokasóknunum. Við fengum færin til þess að klára leikinn en gerðum það ekki.

"Ég var samt ekki sáttur við dómgæsluna í heild sinni. Til að mynda fannst mér Valsmenn fá að spila lengri sóknir en við oft á köflum. Höndin fór oft upp eftir stuttan tíma hjá okkur á meðan þeir fengu að spila langar sóknir."

Leikmenn og þjálfarar FH voru voru virkilega reiðir eftir leikinn og margir þeirra kusu að tjá sig ekki við blaðamann þar sem þeir höfðu ekkert nema neikvætt um að segja um dómarana.

"Ég held það sé skynsamlegt að halda kjafti núna. Þetta var glórulaust," sagði einn leikmanna FH sem vildi ekki veita viðtal.