Hannes Þór og Gunnhildur Yrsa valin best

Hannes Þór Halldórsson, markvörður KR, og Gunnhildur Yrsa Jónsdóttir, fyrirliði Stjörnunnar, voru í dag valin bestu leikmenn Pepsi-deildanna í árlegu kjöri leikmanna deildarinnar.

Hannes Þór átti frábært tímabil með KR sem varð bæði Íslands- og bikarmeistari nú í sumar. Hann gekk til liðs við félagið fyrir tímabilið frá Fram og átti stóran þátt í góðu gengi liðsins í sumar. Hannes lék alla leiki liðsins á tímabilinu, bæði í deild og bikar.

Gunnhildur Yrsa fór fyrir liði Stjörnunnar sem varð Íslandsmeistari í fyrsta sinn í sögu félagsins í sumar. Stjarnan vann sautján deildarleiki í sumar og tapaði aðeins einum en Gunnhildur Yrsa spilaði alla leikina og skoraði alls sjö mörk.

„Þetta kom mér á óvart. Auðvitað hafði þetta eitthvað verið í umræðunni en maður býst aldrei við því. Það var því mjög ánægjulegt að heyra nafnið sitt kallað við þessar aðstæður,“ sagði Hannes við Vísi eftir afhendinguna.

„Það eru leikmennirnir sem velja og ég er því sérstaklega ánægður með það. Ég er mjög stoltur af þessu.“

Hannes átti frábært tímabil með KR þar sem hann varð tvöfaldur Íslandsmeistari og spilaði þar að auki í forkeppni Evrópudeildar UEFA. Þá spilaði hann sinn fyrsta landsleik á árinu og hélt í honum marki Íslands hreinu í sigurleik gegn Kýpur.

„Þetta var í raun fullkomið tímabil. Við unnum tvöfalt og vorum á toppnum allt tímabilið. Þetta var lyginni líkast og þessi viðurkenning kórónar sennilega skemmtilegasta sumar sem ég hef lifað.“